Вступны результаты повселюдного спису 2021. Меншын іщы не порахували

В четвер, 27. січня/януара 2022 р., в само полудне в рамках ІІІ Демоґрафічного Конґресу одбыла ся інавґуруюча конференция, на котрій представлены были вступны результаты повселюдного спису з 2021 рока. Патронат над ньом обнял президент Польской Республикы Анджей Дуда.

Як дознали сме ся з материялів, котры вказуваны были вчас конференциі, в Польщы о 0,9% зменьшыла ся кількіст жытелів, зрівнуючы тот і попередній спис з 2011 рока. Станом на 31. марця 2021 р. (бо така дата была принята) в Польскій Республиці жыє 38.179,8 тис. люди, з якых 51,5% то жены, а 48,5% то мужчыны.

Польща ся старіє

Нич Головный Статистичный Уряд не опубликує детальнійшых даных, нам остає звернути увагу на тото, што уж было подане. З важнійшых інформаций, котры ГСУ пошырил на конференциі, єст структура соспільства подля економічных ґруп. І хоц тренд был знаный уж перше, то тепер дознали сме ся дрібниц, же зменьшыл ся одсоток громадян в передпродукцийній і продукцийній ґрупах, а міцно збільшыла ся попродукцийна ґрупа з 16,9% до 21,8%, т.є. такой 5 процентовых пунктів, што значыт, же Польща ся старіє, а люди на пенсиі єст пропорцийонально більше взглядом спису з 2011 рока.

Збільшыла ся тіж кількіст мешкань. Даны вказуют, же 31. марця 2021 рока было іх 15,2 млн (6,8 млн будинків), што значыт, же єст іх о 1,7 млн більше як в 2011 р. (аналоґічно – будинків єст більше о 800 тис., т.є. о 13,3%).

Меншын іщы не порахували

Для тых, што нетерпеливо ждут на результаты повселюдного спису в области декляраций нацийональности, або хоснуваня материньского языка дома, не маме добрых вісти. За ґрафіком, якій находиме на сайті ГСУ, тоты даны будут сиґнально заявлены осіню 2022 рока, а конечны даны являт ся аж осіню 2023 рока.

То дост цікаве, аж і шокуюче, кєд же джерелом більшости даных до опрацуваня урядовыма статистиками был самоспис – могуча кількіст респондентів выбрала інтернетову аплікацию, чым обробила долготырваючу технічну част процесу (переписуваня формулярів, высыланя з локальных компутерів рахмайстрів, ітд.).

Так, ци інакше, на актуальны офіцияльны чысла Лемків жыючых в Польщы, як і хоснуваня лемківского языка дома, іщы ждеме. Надіючы ся оптимістично на великы приросты, рекомендуєме зазріти до статій описучых результаты повселюдных списів (в тым і етнічной структуры) в Чешскій Республиці і Словациі.

Полный запис конференциі пониже.

Фото горі: facebook.com/GlownyUrzadStatystyczny