Вселеньскій Патріарха принял польску Президентску Пару

Вчас другого дня візиты польской Президентской Пары в Турциі Вселеньскій Патріарха Варфоломій принял Анджея Дуду і Аґату Корнгаузер-Дуду в своій резиденциі на Фанарі. Інформує о тым інтернетовый сайт президентской канцеляриі.

Перед стрічом з Патріархом Президент вєдно з женом вступили в собор св. Юрия, што находит ся на обшыри патріаршого комплексу. Польскій делеґациі приведено історию мощів св. Йоана Златоустого і Григория Богослова, якы повернули до Константинополя завдякы прихыльности польского папы – Йоана Павла ІІ в 2004 р.

«Патріарха є символом і маяком для вшыткых вірных православной і східніх Церкви, тіж в нашій вітчызні, в Польщы», бесідувал А. Дуда вчас стрічы. «Зо женом, сме вірныма католицкой Церкви, але візита в нашых братів єст про нас великым пережытьом, так духовным, як тіж пережытьом приятельства.

Патріарха Варфоломій споминал на православных в Польщы. Владыка розповіл, што Польска Автокефальна Православна Церков отримала томос од константинопольского патріархату в 1924 р. Духовник спомянул тіж на свою візиту в Польщы в 2015 р., коли на запрошыня митрополиты Варшавского і цілой Польщы Савы положыл краєугольный камін під побудуваня варшавской церкви Агія Софія, яка є вознесена подля взору славной константинопольской святыні.

Президент Дуда навязал до актуальной політичной ситуациі на Білоруси. Повіл, што тепер як раз є специяльный час, коли спільно зо своіма родаками, Поляками, але тіж спілгромадянами Білорусинами, молит ся він о мир. «Молиме ся, жебы віруючы люде могли спокійно жыти на Білоруси» – освідчыл президент.

Вчас стрічы порушено важну тему охороны середовиска, як тіж значыня християньскых вартости і традиций в днешнім світі. Польска Президентска Пара наконец вписала ся в памяткову книгу, де спомнула, што польска православна церков є активным участником соспільного жытя Польщы.

Spotkanie Prezydenta @AndrzejDuda i Małżonki Prezydenta Agaty Kornhauser-Dudy z Patriarchą Konstantynopola Bartłomiejem I. pic.twitter.com/GLBIkXEn2w

— Kancelaria Prezydenta (@prezydentpl) May 25, 2021