Вмерла Сілвія Зелінкова

В неділю, 27-го авґуста 2017-го року, у віці 41 років по довгій і тяжкій хвороті вмерла Сілвія Зелінкова, довгорічна редакторка русиньского высыланя Словацького розгласу – Радіа Патрія.

Народила ся Сілвія Зелінкова, роджена Противнякова, 8-го апріля 1976-го року в Меджілабірцях. Дітинство пережыла у Выдрани, котра є частьов міста Меджілабірці. В роднім місті штудовала на ґімназії, по матуріті продовжовала штудовати на Філозофічній факулті Пряшівской універзіты в Пряшові, де закінчіла персоналный манажмент в комбінації із україньскым языком.

В році 2003 наступила до Редакції народностно-етнічного высыланя Радіа Патрія, котре належыть під Словацькый розглас. Од того часу приготовила стовкы годин проґрамів різного жанру, котры ся высылали в рамках русиньского высыланя. Сілвія Зелінкова была часто і модераторков русиньскых културно-сполоченьскых подій. Як чоловік од фаху была запрошована і до журі цілословацького конкурзу в декламації русиньской прозы, поезії, народного росповіданя, малых сценічных форм і властной творчости під назвов Духновічів Пряшів.

В остатніх роках была екстернов докторандков на Філізофічній факулті Пряшівской універзіты в Пряшові в одборі славістіка. Тему дізертачной роботы, котру не стигла докінчіти, робила у директоркы Інштітуту русиньского языка і културы Пряшівской універзіты Анны Плішковой із русиньского языка. На русиньскім інштітуті была єден час і екстернов співпрацовничков. Учіла шпеціфікы русиньской редакторьской роботы.

Похоронны обряды Сілвії Зелінковой одбудуть ся у віторок, 29-го авґуста 2017-го року, о 13.00 год. у Выдрани. Вічная память!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА