Вмер Яков Кішюгас, автор русиньскых учебників

Як інформовала аґентура Рутенпрес, 9-го мая 2024-го року у віці 75 років вмер Др. Яков Кішюгас, професор російского языка, вызначный освітньо-педаґоґічный діятель серед Русинів Войводины.

Яков Кішюгас значный період свого професійного жывота присвятив русиньскому языку як педаґоґ, але і автор ці співавтор майже вшыткых учебників про основны школы з навчалным языком русиньскым або навчаньом русиньского языка.

Так само быв автором завершальных екзаменів восьмокласників, довгы рокы робив методіка про русиньскый язык, діяв і як професор на Одділіню русиністікы Універзіты в Новім Саді.

Народив ся Др. Яков Кішюгас 1-го новембра 1948-го року в Руськім Керестурі, де здобыв і основну освіту. Ґімназію закінчів у Новім Саді. В столиці Войводины почав і штудовати російскый язык і літературу, тоты штудії закінчів у Сараєві.

По штудіях зачав учіти русиньскый язык на ґімназії в Руськім Керестурі. На школі быв єден час і помічникom директора. У 1981-ім році перебрав ся жыти до Нового Саду, де робив у Oсвітньо-педаґоgічнім заводі Войводины як методік про русиньскый язык.

В тім періоді став автором або співавтором 25-ох учебників, в тім чіслі майже вшыткых ґраматік і хрестоматій про основну школу, котры і доднесь хоснують ся. У 1992-і році здобыв тітул доктора на Філозофічній факулті Універзіты в Новім Саді. На Одділіню русиністікы той універзіты анґажовав ся в рамках предмету Методіка навчаня русиньского языка і літературы.

Далше його карьєрна путь продовжала на Міністерстві освіты, де дозерав на школярьскый штандард у середньошкольскых інтернатах на теріторії цілой Сербії. У тій области так само публіковав. На пензію одышов у 2013-ім році, коли вже робив ведучого Дому штудентів середніх школ Бранково коло в Новім Саді.

За свою креатівну освітньо-педаґоґічну роботу быв нагородженый Святосавсков нагородов, конкретно за два учебникы русиньского языка як волительного предмету, котры были найліпшы в конкуренції вшыткых учебників на меншыновых языках в Сербії.

Яков Кішюгас так само двараз быв нагородженый Нагородов часопису про науку, літературу і културу Шветлосц, котрый выдавать русиньске выдавництво Руске слово. Вічная память!