Вмер отець Мілан Ґерка

У віці 76 років вмер у віторок 2-го новембра 2021-го року в Пряшові православный священик отець Мілан Ґерка. Быв секретарьом і говорцьом Святішого сіноду Православной церькви в чеськых країнах і на Словакії.

В минулости быв і деканом Православной богословской факулты в Пряшові. Ґерка быв і членом Метрополітной рады Православной церькви на Словакії а ректором Православной духовной семінарії Православной богословской факулты Пряшівской універзіты в Пряшові.

Актівный на духовній ниві

Мітр. прот. проф. Мілан Ґерка, к. н. народив ся 6-го януара 1945-го року в Ортутовій, русиньскім селі Бардейовского окресу. Абсолвентом православной теолоґії став у 1965-ім році. На Православній богословскій факулті втогдышньой Універзіты Павла Йозефа Шафарика в Пряшові зачав діяти по здобытю кандідатуры на Петербурзькій духовній академії.

Од 1983-го року быв професором православной теолоґії. Занимав ся ексеґезов Старого завіта і єврейскым языком. В роках 1987 аж 1993 быв деканом факулты.

Актівным быв і як душпастырь. Быв кантором в Катедралнім соборі св. князя Александра Невского в Пряшові, економом Уряду єпархіалной рады Православной церькви в Пряшові, духовным справцьом Православной церьковной общіны в Завадці (на Спішу), орґанізовав і Православну церьковну общіну в Спішскій Новій Всі. Основав і церьковны общіны на западній Словакії, головно про духовны потребы реоптантів, котры ся там переселили з Україны.

Быв так само канцеларьом Уряду метрополітной рады Православной церькви на Словакії, і од 1998-го року аж до свойой смерти быв деканом про окресы Спішска Нова Вес, Ґелніця і Левоча. В році 1998 основав Філантропію Православной церькви на Словакії, пак став їй директором. Од 2001-го року быв секретарьом і говорцьом Святішого сіноду Православной церькви в чеськых країнах і на Словакії.

Ходив меджі Русинів

Отця Мілана Ґерку добрі знали Русины. Много раз чути го мож было в рамках духовных приговорів, котры мав про русиньске высыланя Словацького радія, ходив і на русиньскы културно-общественны події.

Часто в минулости помагав і при орґанізованю подій в Словацькім народнім музею – Музею русиньской културы в Пряшові, головно кедь ся робили културны проґрамы повязаны з выставков перед такыма праздниками як Великдень і Рождество.

Вдяка отцьови Міланови Ґеркови, його намагам, помочі, выникла у просторах русиньского музея у 2020-ім році експозіція під назвов Утверди, Боже – з історії Правосланой церькви на Словакії до року 1948. Вічная память!

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА