Вмер о. Штефан Сюч

Вчера, 9. грудня/децембра в Хусті (Підкарпатска Русь), в 84 році жытя вмер протоєрей Штефан Сюч.

Отец Штефан Сюч вродил ся 11. січня/януара 1931 р. в селі Теково (Tekeháza) над Тисом. Вчыл ся в хустскій ґімназиі, де жыл в місцевій грекокатолицкій бурсі «Алумнеум». В 1955 р. завершыл зоотехнічний інститут во Львові, пак студиювал во ветеринарийній академіі в Москві. Потім вернул на Підкарпатя і робил в Рахові. Долгы рокы допомагал як прислужник о. Миколі Ляховичови – тайному священникови, при одправах грекокатолицкых літургій. Од него в 1968 р. достал рекомендацию, доручену мукачівскому єпископови русиньской грекокатолицкой церкви, на тайны богословскы студиі. З причыны політычных переслідувань грекокатоликів на совітскій Украіні, аж по двадцетьох роках міг доступити хіротоніі. Был высвячений 26. липця/юлия 1990 р. русиньскым мукачівскым владыком Йоаном Семедійом в селі Білкы (Bilke) при Іршаві, єдным з найбільшых сел на Підкарпатскій Руси (7.500 жытелів). Найперше был парохом в селах міжгірского району, а пак остал деканом тячівского, рахівского і хустского районів. Завдякы його організаторскым здібностям збудувано, а в 2005 р. посвячено, новий храм св. Первомученика і Архідіякона Штефана та св. Великомученика Пантелеймона. В тій церкви о. Штефан Сюч служыл до кінця своіх днів.

Покійний о. Штефан Сюч был актывным підпорительом русиньского руху на Підкарпатскій Руси. Был орґанізатором і присутным на вельох акциях, фестівалях і мітинґах. Брал участ в конґресах Русинів як член президиі Народной Рады Русинів Закарпатя.

Остатній раз слухачы радия ЛЕМ.фм могли чути його голос в жолтни/октобрі т.р., коли торжественно одкрывал фестіваль “Червена Ружа” в Мукачеві і молил ся за будуче вшыткых Русинів світа.

Царство Йому небесне. Вічная памят.

10. грудня/децембра о 17.00 год. (за русиньскым часом) в церкви свв. Штефана і Пантелеймона в Хусті буде проходило богослужыня за усопшым священником. Похорон о. Штефана Сюча одбуде ся 11. грудня/децембра о 10.00 год. (за русиньскым часом). Архієрейску літургію одправит помічний єпископ мукачівской русиньской грекокатолицкой єпархіі – Ніл (Лущак).