Вмер о. Григорий Назар, ґорлицкій і білянчаньскій парох

В неділю 14. мая 2023 р. несподівано вмер о. прот. Григорий Назар, парох грекокатолицкых парохій в Ґорлицях і Білянці.

Священник нюс послугу на Лемковині од долгых років. Покійный вродил ся 2. червця/юнія 1974 р. в Ґданьску, мешкал в Стеґні, а його родинном парохійом был Циґанок/Желіхово к. Нового Ґданьского Двору.

Рукоположеный на священника был 3. червця/юнія 2000 р. в Перемышли. Початкого был призначеный за вікария парохіі в Ґурові Ілавецкым, а пак был признаный служыти на Лемковині, де обнял посаду пароха церкви Преображыня Господнього в Ґорлицях.

В своім душпастырскым жытю служыл тіж вірным в Білянці і Рыхвалді, а перед тым так само в Розділю (Боднарці) і Панкній.

Бл. п. о. Григорий Назар, будучы на Лемковині, анґажувал ся в промуваня лемківской культуры. Спілпрацувал з фольковым ансамбльом Серенча, приміром вюл як конферансиєр його остатні ювілейны концерты. Был заанаґажуваный в орґанізацию Малопольскых Дни Культуровой Спадковины як координатор церковной стежкы. Брал участ в Фестівали Церковной Музикы в Низкым Бескіді, котрого перша едиция была в 2006 р. Пропаґувал ідею Зъізду Боднарчан – подіі, вчас котрой сходили ся выселенці з села Боднарка і іх потомны. В 2009 р. был присутный в Рускій Бурсі в часі святкуваня приверніня маітельскых прав Стоваришыню до будівлі.

В 2007 р. Капітула нагороды ґорлицкого повіту – Мосты Старосты, выріжнила о. Назара за промоцию лемківской культуры, а в 2013 р. был лавреатом Нагороды Малопольского Воєвідства ім. Марияна Корнецкого за заслугы в обшыри охороны і опікы над памятками деревяной архітектуры. По 24. лютого/фебруара 2022 р. заанґажувал ся в поміч Украіні.

Был заанґажуваный в орґанізацию Світовых Дни Молодежы, опікувал ся молодыма людми.

Был ведучым Архієпархіяльной Комісиі до Справ Душпастырства Молодежы і членом Братства Грекокатолицкой Молодежы «Сарепта».

5. квітня/апріля тр. стрітил ся в Ватикані з папом Франциском.

Одышол в недільный ранок. Свою послідню службу одправил в Перемышли ден перед смертю, де спілслужыл владыці Євгенови (Поповичови), митрополиті перемышльско-варшавской архієпархіі УГКЦ в Польщы.

Вічна Памят!

Похоронны богослужыня зачнут ся 16. мая о 13.00 год. в ґорлицкій грекокатолицкій церкви (чытаня Євангелиі, Парастас, Літургія). На другій ден тіло Покійного буде перевезене до Циґанка. В четвер, 18. мая в Циґанку о 18.00 год. буде служеный Парастас. Похорон одбуде ся в пятницю, 19. мая (о 11.00 год. Літургія в церкви в Циґанку, пак зложыня тіла на цмонтери в Стеґні).