Вмер др Збіґнєв Сятковскій

З жальом інформуєме, же 4. листопада/новембра 2017 р. вмер др Збіґнєв Сятковскій, знаний історик літературы, цінений університетскій выкладач, а при тым щырий приятель Лемків. Похоронны богослужыня пройдут в найблизший понедільок, 20. листопада/новембра, в Кракові.

Др Збіґнєв Сятковскій был выкладовцьом Ягайлоньского Університету, Академіі Красных Штук, Державной Высшой Театральной Школы, членом Польской Академіі Наук і Польской Академіі Знань та автором чысленных публикаций, был і звязаний з Народным Театром в Новій Гуті.

Покійний был великым приятельом Лемків. Голосил выклады на тему нашой літературы і представлял творчіст окремых авторів. Як прелеґент брал участ в Лемківскых Творчых Осенях. В 2007 р. был участником ІІІ Світового Конґресу Русиньского Языка в Кракові. Написал вводне слово до вершів Петра Мурянкы, дальше тексты о творчости Петра Мурянкы і Олены Дуць-файфер, а і вступы до збірок Володислава Грабана. Бл.п. Збіґнєв Сятковскій был автором вводного слова до книжкы «A Wisła dalej płynie» Петра Мурянкы, яка в польскым языку вышла в 2007 р. Писал значучы есеі присвячены лемківскій літературі, прим. «Antonycz i klasyfikatorzy» ци «Łemkowskie pokolenie literackie». В явожняньскій бібліотеці орґанізувал стрічы з лемківском поезийом і поетами.