Владыка Юрий стрітил ся з копальниками. Вызначыл капеляна копальників

В звязку з ближучым ся праздником св. Варвары, яка є покровительком копальничого стану, делеґация копальників з Нижнього Шлеска стрітила ся з архієпископом Юрийом, владыком вроцлавско-щеціньской єпархіі ПАПЦ.

Стріча одбыла ся в минулу неділю, 28. листопада/новембра 2021 р., в єпископскій резиденциі во Вроцлаві. Копальничый стан репрезентувало трьох копальників – Лемків. Были то Мариян Шкурат, Іриней Шпытко і Андрий Прибыло. Всітри роблят на майнах в околицях Любіна.

Просиме о молитовну опіку

Владыка Юрий передал копальникам своє благословліня. Єпарха додал, што стріча з нима то велика чест і радіст. «Тішу ся, што серед копальників єст гідні православных Лемків, а тіж вірных православых інчых нацийональности, а нашы копальні сут лабораториями людской солідарности, кєд же під земльом можеме рахувати предовшыткым на Бога, а тіж єден на другого», бесідувал архієпископ.

Делеґация православных копальників передала на рукы вроцлавского владыкы гірничу лямпаду з прошыньом як раз о благословліня і молитву за вшыткых копальників і іх родины. Присутны оповіли о обставинах свойой нелегкой роботы. Владыка задеклярувал свою духову опіку.

Архієпископ Юрий, дякуючы за світло, додал, што оген то світло, а світло то Ісус Христос. «Каждый, хто в своій молитві увиділ Ісуса Христа, ввиділ го як Світло. Люде, котры мают стичніст зо світлом ту на землі, часто го не доціняют, але копальникы, якы роблят під земльом, часом в барз тяжкых обставинах, а напевно все в небезпечных обставинах, до світла мают вынятковый респект» – завершал.

Любіньскій парох капеляном

Вчас стрічы, окрем переданя благословліня і поздраву копальникам, архієпископ Юрий покликал православного Капеляна Копальництва вроцлавско-щеціньской єпархіі.

Остал ним, присутный на стрічы, о. прот. Богдан Репела, парох церкви св. Тройці в Любіні. В любіньскым храмі, до якого приналежыт великє чысло копальників Лемків, од років в вынятковый спосіб возношены сут молитвы за здоровля, успіхы і безпеку цілого копальничого стану.

Владыка выразил надію на дальшы спільны стрічы і молитву з нагоды Дня Копальника. Желал, штобы каждый гірничый зъізд долов кінчыл ся выіздом горі, а тіж попросил копальників, жебы каждый ден памятали о молитві.

Ден Копальника

Одкрытя руды мiди в любiньскым рейонi в марци 1957 р. спричынило, што вельох Лемкiв, выгнаных з Лемковины на захiдні землі в 1947 р., зачало дiяльніст в любiньскым мідьовым комбінаті на ріжных становисках.

Од того моменту каждого рока 4. грудня/децембра є для них вшыткых дньом особливым, вынятковым, припоминаючым о людях звязаных з копальництвом i iх трудах нелегкой роботы, кєд же 4. грудня/децембра подля григорияньского календаря выпадат праздник св. Варвары, покровителькы копальників. Зас за юлияньскым календарьом выходит в тым часі праздник Введіня во Храм Пресвятой Богородиці, великє церковне свято.

За вшыткы рокы через ґлоґівско-любіньско-ліґницкій комбінат перевинуло ся вельо Лемків. Зато тіж каждого рока 4. грудня/децембра копальникы стрічают ся на спільній молитві в храмі св. Тройці в Любіні.

В радию ЛЕМ.фм мали сте нагоду стрітити ся з копальниками Марияном Шкуратом, Любомиром Горощаком ци Адамом Гербутом.