Владыка Мілан Лах став помічным єпіскопом Братіславской єпархії

Як інформує офіціалный сайт Святішого Престола, в понедільок 23-го януара 2023-го року Папа римскый Франціск выменовав владыку Мілана Лаха, дотеперішнього єпарху в Пармі, США, за помічного єпіскопа Братіславской ґрекокатолицькой єпархії.

Владыка Мілан, котрый уж быв помічным єпіскопом в Пряшові, став тітуларьным єпіскопом остракіньскым.

Припоминаме, же братіславскый єпарха Петро Руснак є од апріля 2022-го року єдночасно і апостольскым адміністратором sede vacante Пряшівской архієпархії. Став ним по зречіню ся уряду бывшого пряшівского архієпіскопа і метрополиты Йоана Бабяка.

Апостольскым адміністратором sede vacante Пармской єпархії став по выменованю владыкы Мілана Лаха за помічного братіславского єпіскопа владыка Курт Бурнетт, єпарха Пассаіку.

Владыка Мілан Лах

Владыка Мілан Лах народив ся 18-го новембра 1973-го року в Кежмарку. Богословскы штудії закінчів на Теолоґічній факулті Тырнавской універзіты в році 2001. На діакона быв рукоположеный владыком Міланом Хаутуром в році 2000 в Катедралнім соборі Рождества Пресвятой Богородіці в Кошыцях, і у 2001-ім році там прияв од того самого єпіскопа і священьске рукуположіня. Є членом Товариства Ісусового (єзуіты).

В роках 2001 – 2003 быв у комуніті єзуітів в Кошыцях, де по році діяв і як науковый робітник в Центрі спірітуаліты Выход – Запад Михала Лацка. Од року 2003 до року 2004 быв повіреный веджіньом того центру, єдночасно выпомагав як священик в Кошыцях і околіці. В році 2004 зачав высшы штудії на Папскім восточнім інштітуті в Римі, де здобыв у 2006-ім році ліценціат з восточных церьковных наук і в році 2009 здобыв докторат в тій самій дісціпліні обгайобов дізертачной роботы Вклад Юрія Іоаннікія Базиловіча ЧСВВ до монашеской формації василіянів Мукачовской єпархії в роках 1789 – 1821. Владыка Мілан быв почас римскых штудій і выпомічным шпірітуалом Папской колеґії Russicum, і духовный асістент Федерації скавтів Европы в Римі. Авторьскы співпрацовав і з Ватіканьскым радіом.

По навернутю зо штудій в році 2009 робив як директор знова у Центрі спірітуаліты Выход – Запад Михала Лацка в Кошыцях. Єден семестер учів спірітуаліту хрістіаньского Востока на Теолоґічній факулті Католицькой універзіты в Кошыцях, де быв і членом редакчной рады теолоґічного часопису Verba Theologica. Од 1-го децембра 2011 быв продеканом про загранічны односины і розвиток на Теолоґічній факулті Тырнавской універзіты в Братіславі, де вчів хрістіаньску спірітуаліту і спірітуаліту хрістіаньского Востока. Владыка знать італійскый, анґліцькый і російскый язык, пасівно знає і французькый язык.

За помічного єпіскопа Пряшівской ґрекокатолицькой єпархії владыка Мілан быв менованый дня 19-го апріля 2013-го року Папом римскым Франціском. За єпіскопа быв рукоположеный 1-го юна 2013-го року в Лютині. В періоді років 2016 аж 2017 быв візітатором Конґреґації про восточны церькви про восточны семінарії і колеґії в Римі.

24-го юна 2017-го року быв Папом римскым Франціском менованый за аміністратора Ґрекатолицькой русиньской єпархії в Пармі sede vacante. 1-го юна 2018-го року быв менованый за пармского єпарху, інтронізованый быв 30-го юна того самого року.

Владыка Мілан сам має русиньске походжіня – його родічі суть з Остурні і він ся ку своїм коріням уж не раз приголосив і в різных інтервю про медії. Підпорив і русиньску кампань перед списованьом жытелів у 2021-ім році на Словакії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА