Владыка Мілан Лах став апостольскым візітатором про западну Европу

Як інформовав Святішый Престол на своїм офіціалнім вебсайті, Святішый Отець Франціск призначів у четверь 21-го новембра 2024-го року, на праздник Входу Пресвятой Богородіці до Храму, Преосвященого владыку Мілана Лаха за апостольского візітатора про словацькых ґрекатолицькых віруючіх в западній Европі.

Преосвященый Мілан вєдно з новов функційов зістає і помічным єпіскопом Братіславской єпархії.

Апостолсьскый візітатор є делеґатом Папы Римского, векшынов на посаді єпіскопа. Має уділены особливы, шырокы уповномочіня і одповідный є лем перед Вселеньскым Архієрейом. Окрім іншого выконує обоязкы єпіскопа в єпархії, де не є єпіскопа, або про віруючіх, якы не належать під даяку теріторіално выділену єпархію.

Преосвященый владыка Мілан (1973 р.) як єпіскоп уж служыв на веце місцях. За помічного єпіскопа Пряшівской архієпархії быв менованый дня 19-го апріля 2013-го року Папом Римскым Франціском. Єпіскопску хіротонію прияв 1-го юна 2013-го року в Лютині. В періоді років 2016 аж 2017 быв і візітатором втогдышньой Конґреґації про восточны церькви про восточны семінарії і колеґії в Римі.

24-го юна 2017-го року быв Вселеньскым Архієрейом Франціском менованый за аміністратора Ґрекатолицькой русиньской єпархії в Пармі sede vacante. 1-го юна 2018-го року быв призначеный за пармского єпарху, інтронізованый быв 30-го юна того самого року.

23-го януара 2023-го року Святішый Отець Франціск призначів Преосвященого Мілана Лаха за помічного єпіскопа Братіславской ґрекокатолицькой єпархії. В тім часі братіславскый єпарха, Преосвященый Петро Руснак, быв дочасно і апостольскым адміністратором sede vacante Пряшівской архієпархії.

Владыка Мілан сам має русиньске походжіня – його родічі суть з Остурні, і він ся ку своїм коріням уж не раз приголосив і в різных інтервю про медії. Підпорив і русиньску кампань перед списованьом жытелів у 2021-ім році на Словакії.