Владыка Кіріл Василь призначеный за члена Дікастерії про кавзы святых

Як у суботу 17-го фебруара 2024-го року інформовала Пресова служба Святішого Престола, Папа римскый Франциск призначів Його Высокопреосвященство владыку Кіріла Василя, архієпіскопа і кошыцького єпархіалного єпіскопа за члена Дікастерії про кавзы святых.

Окрім владыкы Кіріла были до той дікастерії призначены і далшы новы членове, як пише ся в комунікаті Святішого престола.

„Дякую Святішому Отцьови за довіру. Ціню собі то. Тым менованьом мі бізовно прибуде роботы, но вірю, же з помочов Божов то звладну,“ реаґовав владыка Кіріл на свою нову посаду.

„Затля є прискоро бісідовати, што вшытко ня чекать. Бізовно то буде реґуларна участь на рядных і міморядных засіданях конґреґації, а в дакотрых припадах повніня ролі такзваного ‚поненса‘, значіть передкладателя завершальной справы і пропозіції при окремых канонізачных процесах, што выжадує комплексне наштудованя канонізачного спису, справ постулаторів і передкладаня фіналной пропозіції про конґреґацію,“ повів кошыцькый єпарха про Пресову канцеларію Конференції єпіскопів Словакії. Архієпіскоп так само попросив о молитвы за тоту службу.

Про владыку Кіріла то не є перша служба про Святішый Престол. До Кошыць пришов як адміністратор єпархії у 2020-ім році, і в році 2021 быв призначеный за єпарху.

Перед тым, коли жыв у Римі, быв конзултором веце конґреґацій і членом Верьховного трібуналу Апостольсокй сіґнатуры у Ватікані. Од мая 2009-го року быв секретарьом втогдышньой Конґреґації про восточны церькви. Втогды быв і призначеный за архієпіскопа. Од кінця юла 2023-го року быв папскым делеґатом із особливыма правами про католиків Сірійско-малабарьской церькви в Індії, окремо в Архієпархії Енакулам-Анґамалі, де рішыв проблемы з літурґічнов реформов.

Дікастерія про кавзы святых (Dicasterium de Causis Sanctorum) є частьов Римской курії, котра старать ся о баданя і провіріня кавз беатіфікації і канонізації, значіть выголошіня за блаженого або святого.