Владыка Кіріл у новім філмі о ліквідації церькви

Як інформує Пресова канцеларня Конференції єпіскопів Словакії (Tlačová kancelária Konferencie biskupov Slovenska), в тых днях выходить на DVD новый документарный філм під назвов Пасха – із стражданя ку жывоту (Pascha – z utrpenia k životu).

Філм оповідать о насилной ліквідації Ґрекокатолицькой церькви в Чехословакії в 50-тых роках минулого столітя. Головный протаґоніста документу – высокопреосвященый владыка Кіріл (Василь) – на основі сімболічного путованя зо скавтами почас Великодня споминать на ліквідацію і зновуожытя Ґрекокатолицькой церькви в Чехословакії. Ку оповіданю залучіть ся і його отець, міджічасом помершый ґрекокатолицькый священик Михал Василь. О пронаслідованій церькви, но і тій сучасній, бісідують отець і сын.

В тім році суть округлы юбілеї трьох смутных подій – Акції Р, Акції П і Акції К. Ішло о ліквідацію мужскых і женьскых монастырів на теріторії Чехословакії і Ґрекокатолицькой церькви. В арешті умер ґрекокатолицькый єпіскоп блаженый єромученик Павел Петро (Ґойдіч), єпіскоп помічник блаженый єромученик Василь (Гопко) быв 14 років арештованый. Філм не є граным документом, а жывым образом історій людей, выповідей свідків, но і продовжователів у жывотнім путованю.

Высокопреосвященый владыка Кіріл (Василь) ся народив 10-го апріля 1965 р. в Кошыцях. Є архієпіскопом і секретарьом Конґреґації про выходны церькви, што є найвысша посада, яку коли здобыв ґрекокатолик із теріторії днешньой Словакії у Ватікані. Є професором на дакілько універзітах. В рр. 2007 аж 2009 быв ректором Папского выходного інштітуту (Pontificio Istituto Orientale) в Римі, до 2007 р. быв деканом Факулты выходного церьковного права той універзіты. Рукоположеный на єпіскопа быв 14-го юна 2009 р. у Базіліці „Santa Maria Maggiore“ в Римі. Його тітуларна єпархія є у Птолемайді в Лібії.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА