Влада СР в Ґаланті приобіцяла створіня окремой Рады влады про меншыны

В середу 27-го марца 2024-го року в Містьскім културнім центрі в Ґаланті одбыло ся выїздове засіданя влады Словацькой републікы. Премєр Роберт Фіцо по засіданю оголосив створіня Рады влады про народностны меншыны. Інформовала о тім аґентура TASR.

Влада в окреснім місті Ґаланта, в котрім є велике чісло мадярьского населіня, схвалила і пропозіцію зміны штатуту уповномоченого влады СР про народностны меншыны, на основі чого мають ся му розшырити компетенції, наприклад в области співпраці з централныма орґанами штатной справы.

Змінов штатуту, за котру высловили ся і членове Выбору про народностны меншыны і етнічны ґрупы на своїм засіданю в середу 21-го марца 2024-го року, уповномоченому дадуть ся компетенції при забезпечованю задач орґану посередника в области прав і поставліня народностных меншын, „покля буде Уряд влады Словацькой републікы узнесіньом влады або на основі договору повіреный таков задачов“.

Єднако уповномоченый по новому буде мати можливость передкладати пропозіції на засіданя владного кабінету і посередництвом премєра. Выслідком буде подля документації ку передложеній, а теперь уж схвланій зміні штатуту, „ефектівніша можливость зліпшованя условій про розвиток прав і поставліня народностных меншын“. Новый штатут є чінный дньом схваліня владов.

Премєр Роберт Фіцо по засіданю влады так само інформовав, же кабінет договорив ся на створіню окремой Рады влады СР про народностны меншыны, котра ся має выділити як окремый порадный орґан із сучасной Рады влады СР про людьскы права, народностны меншыны і родову рівность. За словами Фіца тото „знова дасть якость вопросам поставліня народностных меншын.“

Припоминаме, же в минулости існовала Рада влады про народностны і вів єй член владного кабінету – підпредседа влады СР про людьскы права і народностны меншыны. Тота функція і рада были зрушены в році 2012 по парламентных выборах, котры выграла партія Smer-SD втогдышнього і сучасного премєра Фіца із здобытком 44,31 процента голосів, чім собі забезпечіла 83 кресел в Народній раді Словацькой републікы, і не потребовала коалічного партнера на владнутя.

З Рады влады про народностны меншыны став лем Выбор про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность – порадный орґан порадного орґану влады, а намісто підпредседы влады меншыны втогды дістали уповномоченого.

Аж теперь хоче влада Роберта Фіца вернути до того, по чім меншыны кличуть цілы рокы, хоць партія Smer-SD была владным субєктом нелем в роках 2012 аж 2016, але і в роках 2016 аж 2020.

Жрідло фотоґрафії: FB / Richard Takáč – minister pôdohospodárstva a rozvoja vidieka.