Влада одкликала уповномоченого про народностны меншыны

В середу 25-го октобра 2023-го року влада Словацькой републікы під веджіньом премєра Роберта Фіца, котру в тот самый день выменовала презідентка Зузана Чапутова, одкликала на своїм першім засіданю уповномоченого влады Словацькой републікы про народностны меншыны Ласла Буковского.

Так само быв одкликаный уповномоченый влады Словацькой републікы про ромскы комуніты Ян Геро.

Ласло Буковскый быв на посаді уповномоченого од апріля 2016-го року. У функції быв почас влад Роберта Фіца, Петра Пеллеґріні, Іґора Матовіча, Едуарда Геґера і Людовіта Одора. В часі, коли наступив за шефа Уряду уповномоченого влады СР про народностны меншыны, быв номінантом партії Most-Híd, котра втогды з Фіцовов партійов Smer-SD, партійов Sieť i націоналістічнов SNS творила владну коаліцію.

„Думам, же од 2016-го року єм успішно просаджовав інтересы меншын про захованя їх языка і ідентічности, а зато належыть подяковати каждому, хто ділив і помагав наповняти мої візії о меншыновых правах,“ написав Буковскый на соціалній сіті.

„Затля не знаме, якы має нова влада планы в области просаджованя і послиніня прав меншын, но надіям ся, же не забуде на народностны меншыны, котры творять десять процент населіня, і буде брати до увагы їх шпеціфічны потребы. Желам собі, жебы меншыновы комуніты в новій владі нашли партнера, котрый буде отвореный і актівный в комунікації з меншынами,“ написав Буковскый.

Буковскый так само загнав писмо людям, з котрыма довгы рокы у функції співпрацовав, наприклад членам Выбору про народностны меншыны і етнічны ґрупы. В нім пише, же не думать, же то была марна боротьба.

„Я пересвідченый, же за остатні рокы ся мі подарило просадити много хосенных леґіслатівных і нелеґіслатівных змін. Была про мене честь з Вами співпрацовати і творити ліпшы условія про меншынову політіку на Словакії. Тоты успіхы бы єм не знав досягнути без Вашой помочі, підпоры і співпраці.“

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА