Влада бы о новім фінанцованю меншын мала їднати до кінця рока

17-го юна 2016 в просторах Міністерства културы Словацькой републікы проходила перша стріча робочой ґрупы зрядженой на выпрацованя єдной із ключовых пріоріт владной партії Most-Híd, закона о фінанцованю народностных меншын.

На владі до кінця рока

Цільом закона, як інформує офіціалный сайт партії, є забеспечіня сістематічной, досотйной і транспарентной підпоры културных і умелецькых актівностей вшыткых народностных меншын в Словацькій републіці і пропорціолна компензація фінанчных средств міджі меншынами. Партія Most-Híd при вступі до влады жадала вытворіня фонду на фінанцованя културы народностных меншын і брала то за єдну із своїх пріоріт, котру наконець і протисла до Проґрамового выголошіня влады.

Ласло Буковскі, уповномоченый влады Словацькой републікы про народностны меншыны, быв зволеный за председу робочой ґрупы. Абел Равас, уповномоченый про ромскы комуніты, буде так само членом робочой ґрупы. Ґрупа доїднала ся на основных рамках приготовльованя закона, котрый має быти на їднаня влады Словацькой републікы передложеный до кінця того рока.

Яке бы мало быти нове фінанцованя

Буковскі бере за єден із головных цілів у своїй функції схваліня нового закона о фонді на підпору културы народностных меншын. Обіцять собі од того стабілізацію і одполітізованя підпоры народностной културы на Словакії. Бісідовав о тім уж при своїм зволіню до функції в апрілі 2016-го року.

У фонді бы мало быти веце грошей (обіцяно є раз тілько, як тому было того року), обєм грошей бы мав быти стабілный, не мав бы ся міняти каждый рік, як тому є теперь, подля схваленого державного розрахунку на даный рік, і меншыны самы бы мали рішыти, як тоты грошы розділити. У вопросі найвекшого нароснутя обєму грошей, кібы ся закон прияв так, як го хотіла уж довшый час просадити партія Most-Híd, поміг бы головно Мадярям.

Заведжіньом фонду, подля пропозіції партії, бы перестав платити модел перероздільованя грошей міджі окремы меншыны, котрый просадив Округлый стіл Русинів Словеньска. Русины бы в рамках нового фонду дістали на свої културны актівности реално веце грошей, але то лем завдякы векшому обєму грошей обще выділеных на културу меншын. В рамках перецентуалного перероздільованя цілковой сумы на меншыны, бы на тім были гірше.

Фотоґрафія: most-hid.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА