„Vivat, Akvarelia!” Мариі Янко – реляция в лем.фм

20. листопада 2013 р. (середа) о 12:30  радийо лем.фм, запрашат на реляцию з подіі.

14. листопада 2013 рока о 18.00 год. архітект  Анна Гошовска – Томчык  в Фундациі св. Владиміра в Кракові, при ул. Каноничій 15, отворила вернісаж выставы акварелі Мариі Янко названий “Vivat,Akvarelia!”. Працы артисткы мож обзерати през наступний місяц. Сердечні запрашаме.
Мария Янко вродила ся в селі Дубляны на Украіні на Самбірщыні. Є членом Фонду Дошліджыня Лемківщыны. В 1988 р. завершыла Львівску Нацийональну Академію Штукы. Артистка є частым гостьом Лемківской Творчой Осени, імпрезы, орґанізуваной Стоваришыньом Лемків і Стоваришыньом Руска Бурса, якой цілью є промуваня і популяризуваня русиньской літерацкой творчости.

Аквареля, олійне малярство і ґрафіка, то улюблены технікы артисткы, робит тіж горячий батік, вытинанкы, лялькы-мотанкы, соломяны різдвяны павукы, малює лемківскы писанкы, фотоґрафує, пише вершы, котры публикуваны были в часописах “Лемківщина” (ЗША), “Карпатська Русь” (ЗША), “Бесіда”, “Загорода”.
Працы Мариі Янко презентуваны были на більше як 60-ох выставах на Украіні і поза єй границями: Мадяры (2010), Словация (2006,2007), Польща (2008,2009,2010).
Персоналны выставы: 2004, Львів, Музей-Скансен Народной Архітектуры і Быту; 2005, Самбір, Музей “Бойківщина”; 2008, Льві,в Музей М.Грушевского; 2010, Винникы Історычний Музей; 2011, Львів, Державний Музей.
Інспірацийом Мариі Янко є, медже інчыма, Лемковина. Чом? Слухайте нас в середу о 12:30! Дізнате ся про тото і іщы веце.

джерело інформаций:

Знимкы з подіі: