Віцеміністер Шыманьскій стрітил ся з меншынами в Зеленій Горі

Toмаш Шыманьскій, секретар стану в Міністерстві Внутрішніх Справ і Адміністрациі початком тыжня візитувал любушскє воєвідство. Стрітил ся з меншынами. Заповіл, што уряд буде частійше діял в терені.

Віцеміністер Томаш Шыманьскій был в понедільок 9. вересня/септембра гостьом ІІІ звычайной сесиі Соймику Любушского Воєвідства, а скорше особисто стрітил ся з властями воєвідства. Головны темы, якы были підняты, то: спілпраца медже урядом а самоурядом, підпертя для самоурядів ци трансгранична безпека.

Міністерство хоче быти ближе люди

Міністер заґарантувал, што будут веце робити в терені. «Рішыли сме одтворити правильну комунікацию з самоурядом, стати ся партнером до того, жебы зачати з вами бесідувати, слухати вашых потреб і, вкінци, зачати помагати реализувати задачы, до котрых так само зобовязаный єст уряд влады» – повіл міністер Шыманьскій. Заґарантувал, што реализуваня той місиі буде проходило тіж через частійше діяня в терені, не лем на сесиях соймику, але тіж в повітах ци ґмінах.

Міністер Внутрішніх Справ і Адміністрациі як властивый для самоуряду, але так само до справ віроісповідань та нацийональных і етнічных меншын, будучы в Зеленій Горі, стіртил ся з представниками меншыновых ґруп.

Бесідували о проблемах з фінансуваньом меншыновых проєктів, блудах в Повселюдным Списі ци дискримінациі в медиях. Присутны были м.ін. Ізабеля Яськовяк з Ромского Освітового Товариства «Гаранґос» ци о. Артур Ґрабан зо Стоваришыня «Лемко Тавер».

«Нашом місийом є выйти з міністерияльных ґабінетів і стрічати ся з меншынами на обшыри воєвідства, в місцях, де реализувана є діяльніст, што пропаґує меншыны. Хочеме мати як найвеце осіб, котры оповідают нам о своіх проблемах і показуют тоты обшыри, котры вартат поправити. Дотепер нихто не іздил в терен, не стрічал ся з меншынами на іх терені, а такы стрічы сут барз потрібны» – повіл віцеміністер Шыманьскій.

О. Ґрабан: Оціна внесків не єст транспарентна

Вчас бесіды віцеміністер Шыманьскій повіл, же уряд робит над новым реґуляміном, котрый тыкат признаваня дотаций – має заґарантувати одповіднє фінансове підпертя меншын і розвиток етнічных ґруп. «Будеме хотіти преміювати тоты культурны, едукаицйны ци освітовы подіі, котры сут найліпшы і становлят о достоменности даной меншыны, і котры сут ефективны, трафляют до найвекшого чысла осіб» – повіл міністер.

О. Артур Ґрабан, ведучый Стоваришыня «Лемко Тавер» повіл для Радия Зелена Гора, што проблемом сут грошы. «Проблемы сут, як все, предовшыткым фінансовы, бо фурт бракує грошы на культурну діяльніст як іде о нацийональны і етнічны меншыны. Фінансуваня є подібне як 15 років тому, кошты сут о вельо высшы. То пробемы, котры од вельох років сут такы самы. Друга річ є така, што оціна внесків не єст транспарентна, не знаме, чом некотры внескы мают дофінансуваня, інчы го не достают, бракує пунктациі» – оцінил священник.

На стрічы в зеленогірскым ратушы присутна была тіж Ізабеля Яськовяк з Ромского Освітового Стоваришыня «Гаранґос». «Серед нашой соспільности хотіли бы сме поправити обшыр едукациі, то єст пріоритет, і тіж сферу дискримінациі, поправу нашого візерунку серед векшынового соспільства і переламуваня стереотипів» – повіла Яськовяк.

Фот. П. Козубай rzg.pl