Вігорлатьскій музей в рамках святковань сторічніці о Добряньскім

Вігорлатьскый музей в Гуменнім із нагоды сторічніці выникнутя Чехословакії приготовив на дні од 25-го до 28-го октобра 2018-го року продовжіня споминовых подій присвяченых Адолфови Добряньскому.

Штиридньовый сполоченьско-културный проґрам під назвов Одказ Адолфа Івановіча Добряньского про сучасность робить музей в співпрацуі з партнерьскыма орґанізаціями в Левочі, Гуменнім, Михалівцях і Рудлові.

Лекції на школах і стріча в Рудлові

В рамках події 25-го октобра із жывотом Добряньского познакомлять ся штуденты почас блоків лекцій і святочной академії на Ґімназії Янка Францісціго-Рімавского в Левочі і о день пізніше, 26-го октобра на Ґімназії армадного ґенерела Людвіка Свободы в Гуменнім.

В суботу 27-го октобра одбуде ся публічна споминова стріча в роднім селі Добрянсьского – в Рудлові, де буде проходити проґрам коло памятника. В неділю святкованя перенесуть ся до Михаловаць, де одбуде ся Божественна літурґія в Православнім катедралнім соборі свв. Кіріла і Методія і наслідно ся піде ку памятнику Добряньского, котрый ся в місті находить.

В неділю і конференція

Як раз в неділю 28-го октобра одбуде в просторах Вігорлатьского музею в Гуменнім і научна конференція зо святочнов акдемійов. В рамках конференції выступить пять реферуючіх.

Подія штиридньовых святковань одбуде ся під покровительством председы Матиці словацькой Маріяна Ґешпера і председы Пряшівского самосправного краю Мілана Маєрьского. Подія была з публічных жрідел підпорена Фондом на підпору уменя, з розрахунку Пряшівского самосправного краю і Матицьов словацьков.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА