VI Медженародний Фестіваль Церковных Хорів в Креници

В найблизшу неділю, 30. липця/юлия т.р., в креницкій православній церкви св. Владиміра Великого буде проходила 6. едиция Медженародного Фестівалю Церковных Хорів. Орґанізатором подіі є креницка парохія довєдна з містом Крениця.

В рамках тогорічной едициі фестівалю выступит пят хорів, якы наштоден выспівуют не лем церковны творы. Більшіст спосеред запрошеных гостів то хоры з Польщы (в тым чыслі з Лемковины), але до Крениці, так як влони, завитат тіж хор з Пряшівской Руси. Свій выступ даст найперше домашній хор храму св. Владиміра в Креници під дириґентуром выдатного Русина – Петра Трохановского. Дальшым хором з Лемковины буде Роса з Устя Руского. То молодіжний хор, якій попри церковній музыці співат і народны співанкы, тіж лемківскы. Гостьом з Пряшова буде Митрополитарний Хор Православной Церкви Чешскых Земель і Словациі. Дальше вкаже ся знаний на Лемковині ґорлицкій православной мужскій хор Клірос. З Варшавы до Крениці приде студентскій хор св. Татияны.

Тогорічна едиция фестівалю пройде такой два дни по парохіяльным кєрмешы св. Владиміра, праздник якого креницка церков буде припоминала уж в найблизшу пятницю, 28. липця/юлия т.р. Влонишній фестіваль проходил на фоні похоронных богослужынь бл.п. владыкы перемышльско-новосандецкого Адама, тіло якого ден по фестівали было зложене в гробници креницкого храму.