Вежа на Кычері з нагородом. Глядают інвестора

Проєкт видоковой вежы на Кычері доцінили в медженародным конкурсі Graitec Advance Award 2022. Робота авторства Пьотра Біла заняла третє місце в конкурсі для проєктантів в Парижы.

Конструкция має станути на вершку Кычеры в Пулавах (східня Лемковина) в коросняньскым повіті. Вежа буде мала 34 м і буде зужена в половині высокости, а окрем сходів буде мала в центральній части шкланый тунель для вінды. Тото даст можливіст хоснувати вежу особам з неполносправностями. Вежа має мати три видоковы кондиґнациі, найвысшу з перешкліньом.

Бескідскє Туристичне Товариство «Перелом Вислока», котрого є осередок Kiczeraski в Пулавах, глядат фінансовой підпоры, жебы побудувати вежу. Рахує на самоуряды і унійны фундушы.

Проєкт вежы вышол з проєктового бюра Будовляне проєктуваня Роберт Чех. Вежа має форму клепсидры, розрисувана є на пляні форемного шестикутника о боку 6 м. Головна конструкция складат ся з сіткы протинаючых ся дванадцетьох стопів з клиєного дерева. Ядром вежы є осмикутный шкляный тунель вінды. Довкола тунелю запроєктувано стальовы сходы. На вежы будут три видоковы плятформы, найвысшыа буде задашена і вкрыта шкляныма тафлями.

Перше місце в конкурсі занял центр Îlot Pasteur в Монако, в котрым містила ся буде школа, почта, центр рециклінґу, бюра і підземный паркінґ. Буджет на вознесіня будовлі выносит 320 млн евро. Другє місце занял мост CIOLO запроєктуваный для получыня двох части прибережной затокы в Італиі.

Advance Design Award то медженародный конкурс орґанізуваный фірмом GRAITEC, для інжынєрів будівництва, проєктовых бюр і студентів. Нагороду признают за найліпше практичне схоснуваня проґраму Advance Design в проєктах з обшыри сталі/дерева/бетону. Проєкты оцінює фахове жырі.

Фот. www.advancedesignaward.com