Веце годин німецкого для нацийональной меншыны?

Як подає ґазета Rzeczpospolita – можливе, што вернут додатковы годины лекций материньского языка для німецкой меншыны. Ресорт едукациі має робити над розвязанями.

Вчас стрічы з представниками німецкой меншыны міністер едукациі Пшемыслав Чарнек мал задеклярувати, што найпевнійше од вересня/септембра до шкіл верне третя година німецкого языка.

«Самоурядовці повіли нам, што 120 млн зл то выстарчаючо, жебы вести три годины німецкого языка, як материньского для нацийональных меншын. Лем треба досправды тот систем допрацувати, і тото хочеме зробити, а кєд буде одповідній, то од 1. вересня/септембра не виджу перешкід, жебы вернули три годины німецкого языка. Стремиме до того і єм переконаный, што до того дойдеме» – пояснял шеф ресорту едукациі. Як поінформувал, справа буде розсмотрювана на засіданю Спільной Комісиі Уряду та Нацийональных і Етнічных Меншын (СКУтНіЕМ).

Ограничене чысло лекций німецкого языка як материньского звязане є зо зміном принципів іх фінансуваня. Од січня/януара минулого рока голосами владной коаліциі і Конфедерациі, дотация на лекциі была зменшена о 40 млн зл, а од вересня/септембра чысло годин зредукуване з трьох до єдной.

Ограничыня фінансуваня наукы языка меншыны тыкат лем єдной меншыны в Польщы – німецкой. Інчы меншыны вчат ся своіх языків на дотеперішніх принципах. Справа выкликала міцне порушыня серед інчых меншын. Припомнийме, што в рамках протесту перше представникы німецкой меншыны в складі СКУтНіЕМ завісили спілпрацу з урядом, а пак дальшых 14 представників. Протесты не принесли заміреных ефектів. До проблему одкликал ся тіж Григорий Куприянович, ведучый СКУтНіЕМ, в своім выступліню в середу 25. січня/януара тр. вчас новорічной стрічы з Президентом ПР.