Вертают Карпатскы Стрічы

Як інформує порталь karpaccy.pl, од жолтня/октобра т.р., по річній перерві, вертают Карпатскы Стрічы в Музею Землі ПАН в Варшаві. Стрічы будут тепер проходити в каждий третій четвер місяця о 18.00 год. в Вілли Пнєвского при ал. На Скарпі 27.

Того рока будут три стрічы. Перша з них пройде уж 19. жолтня/октобра і буде про періодик «Плай» – Плайови оповісти, значыт три декады з Карпатскым Альманахом «Плай». Заплянувано тіж вчас той стрічы отверти выставу присвячену ювілярьови.

«Плай» то печатаний од 1997 р. крайознавчий періодик про історию, етноґрафію, природу та культуру Карпат. Часто являют ся в ним дописы про Лемків, іх культуру ци історию, примірні в 51. номері «Плая» нашла ся статя Антония Крога про орґанізувану ним, з рамени Округового Музею в Новым Санчы, во спілпрацы з Петром Трохановскым, выставу «Łemkowie-Лемкы».

Друга стріча пройде 16. листопада/новембра. І буде то стріча з Антонийом Крогом про карпатску культуру, котра спілтворена была розмаітым населіньом, кажда громада кус до ней докладала, кус одберала, але того, хто кілько доложыл, а кілько з ней забрал, уж нихто не документувал.

Припомнийме, што Антоний Крог то польскій писменник, тлумач словацкой і чешской літературы, выдатний етноґраф. Єст він орґанізатором карпатскых конкурсів артистичной народной творчости, комісарьом выстав – «Лемкы», «Духы епохы, то єст перша світова война тырват доднес», «Спиш» і другых. Початком мая т.р. книжка Антония Крога «За тамтом гором. Лемківскы спомины» была нагороджена Історичном Нагородом «Політикы» 2017.

Третя і остатня Карпатска Стріча 2017 пройде вынятково в другій четвер місяця, т.є. 14. грудня/децембра. Тадеуш Трайдос розповіст про поміч для церковных обєктів та про отця прeлатa Мєчыславa Чекая. 

Професор Тадеуш Трайдос то польскій історик, автор вельох публикаций м.ін. «Поліхроміі Віктора Зомпга, Боґуша, Андрийівка, Лелюхів» («Альманах Мушыны 2005»), «О Коломыі колишній, вчерашній і днешній» («Плай 2005»), «Бардийівска малярска працовня на пограничы Галичыны і Выжніх Угор в другій чверти XIX столітя» («Маґуры 2005»).

Темы стріч на 2018 рік будут поданы пізнійше. На тоты уж заплянуваны Карпатскє Товариство сердечні просит.