Вернісаж выставкы Зузаны Осавчуковой

Словацькый народный музей – Музей русиньской културы в Пряшові запрашать на вернісаж выставкы Зузаны Осавчуковой під назвов Дорога к цілю.

Выставка є реалізована з нагоды дарованя вытварных робот авторкы до збіркового фонду русиньского музея. Творы подаровав муж авторкы. Вернісаж одбуде ся 23-го септембра 2021-го року о 16.00 год. і выставка потырвать до 30-го септембра 2023-го року.

Русиньска малярька Зузана Осавчукова Гапакова (рр. 1934 – 2020) была родачков із села Пінківці в окресі Собранці. Скінчіла Руську ґімназію в Гуменнім, пак абсолвовала комбінацію вытварна выхова і російскый язык на Высокій школі педаґоґічній в Братіславі. Учіла на Середній педаґоґічній школі в Пряшові, пізніше на Катедрі вытварной выховы Педаґоґічной факулты Універзіты Павла Йозефа Шафарика в Пряшові, одкыль у 1991-ім році одышла до пензії. В тім самім році была прията до Словацькой вытварной унії.

Перед 1989-ым роком, коли Русины не мали властну пресу, робила і в редакції україньского журналу Дружно вперед. Написала учебникы мальованя про першы і другы річникы учітельского нампряму і дакілько далшых высокошкольскых учебників про штудентів педаґоґікы о естетіці і мальованю. У 2014-ім році выдала моноґрафію о своїм братови Штефанови Гапакови, котрый быв так само вызначным русиньскым малярьом.

В їй творчости доміновав пейзаж, пастел і олійовы фарбы, творила закутины ці букеты квітів. Робила і портреты. Мала много выставок, по выникнутю Словацького народного музея – Музея русиньской културы в Пряшові выставльовала і там.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА