Великє Повечеря і святочна Божеска Літургія з Михалова – четвер, 7.00 год.

«Час радости, веселости світу настал ныні» – такы слова чуєме в лемківскій коляді. В тот радістный час просиме Вас в імени нового настоятеля, пароха отця Адама Горбала слухати в четвер 7. січня/януяра 2021 р. о 7.00 год. пренос Великого Повечеря і святочной Божеской Літургіі з церкви св. Михала Архангела в Михалові в нижньошлезскым воєвідстві.

По смерти о. митр. Михала Шляґы (5. листопада/новембра 2020 р.) новым настоятельом парохіі в Мальчыцях менуваный был о. Адам Горбаль, якому так само была поручена в грудни/децембрі 2020 р. опіка над вірныма парохіі в Михалові. Отец Горбаль принял діяконьску і єрейску хіротонію в листопаді/новембрі минулого рока в катедральным храмі во Вроцлаві.

Великє Повечеря то вечернє богослужыня, якє служыт ся перед праздником Рождества Христового. Богослужыня прикрасит своім співом місцевый хор веденый Анном Горощак з хыжы Шпитко.