Великодні ярмакы в терені

Традицийом уж є, што в рамках рыхтуваня перед найвекшым християньскым праздником в містах і місточках орґанізуваны сут великодні ярмакы. Того рока поторгувати ся перед Великодньом буде мож м.ін. в Лоси, Ґорлицях ци Санчы.

Хотіло бы ся речы, што ярмакуваня є старе як світ, шак ярмакували аж і товды, коли не ішло о рыхтуваня до торжества торжеств. Oкрем основной функциі, значыт выміны продуктів, торгы выполняли і соспільно-культуровы функциі. Были місцями, де выміняли не лем товары, але тіж ідеі, знаня, технічны новинкы. Были місцьом, де формувала ся мода і ґуста.

Ярмакы проходили в постійных термінах, переважно при нагоді даякых свят, на пляци при церкви, при костелі, або посередині села ци місточка. В західній части Лемковины перед войном зберали ся на торгах в Тыличы, Жеґєстові, Ґрибові, а в середній і східній м.ін. в Ждыни, Незанайові, Устю Рускым, Дукли, Змигороді, Яслисках, Рыманові ци Воли Миховій.

Днешні ярмакы не мают уж такого значыня, кєд іде о само придбуваня товарів. Сут радше культурном подійом, в рамках котрой мож припомнути сой традициі ци звыкы звязаны з рыхтуваньом ся до дакого свята, нагодом до выслуханя концерту, участи в забаві, словом – способом, жебы провести свобідный час, а при нагоді дашто тіж купити.

В Лоси будут стоіска, варштаты, забавы, выстава, концерт

В своі порогы, як што рока, просит Мазярска Загорода в Лоси. Інституция свій Лемківско-Погіряньскій Ярмак орґанізує уж в найблизшу неділю, 3. квітня/апріля, од 10.00 год. Як все просят цілы родины. Діти будут мочы взяти участ в забавах, варштатах, самодільні зробити великодні прикраскы, писанкы і інчы.

Буде мож купити святочне ідло, інчы выробы ручной роботы місцевых артистів. В рамках подіі пройде традицийный турнір битя яєц, буде мож пообзерати выставу пн. Писанкы. О символах і традициях та выслухати концерт ґорлицкого хору Cantores Carvatiani, котрый вызвучыт в лосяньскій церкви о 15.00 год.

В Ґорлицях на рынку, в Новым Санчы в скансені

О тыжден, 9.-10. квітня/апріля, на Великодній Кєрмеш просит місто Ґорлиці. Окрем стоіск зо святочным асортиментом буде мож купити кісто – в рамках помочы родині Вальонґів з Ґорлиц. Цілый дохід з продажы кіст і кісточок переданый буде на лікуваня двоіх діти: Якова і Матея (дохторе здіаґнозували в них дітячый церебральный параліж, коли пришли на світ в 2007 році) та іх вітця, в якого недавно дохторе ствердили бічну аміотрофічну склерозу, котра скоро поступує.

Реґіональны продукты, святочне печене, меды, прикраскы і інчы буде мож придбати в рамках скансеновского ярмаку на обшыри Ґалицийского Місточка в Новым Санчы.