Векшына пропозіцій націоналных совітів в Сербії буде в стратеґії освіты

Сербске Міністерство про людьскы права, права меншын і соціалный діалоґ в понедільок 15-го марца 2021-го року зорґанізовало в Белеграді тематічну діскусію о Нарисі стратеґії розвитку освіты і навчаня в Републіці Сербія до 2030-го року. Інформує о тім аґентура Рутенпрес.

Стрічу ініціовали націоналны совіты народностных меншын, кедьже на завершальну публічну дебату о нарисі стратеґії Міністерство освіты, наукы і технолоґічного розвитку не покликало представителів меншын.

Як інформує Рутенпрес, на стрічі были в понедільок участны представителі обидвох резортів і фаховых інштітуцій,  меджі нима і державный секретарь Міністерства про людьскы права, права меншын і соціалный діалоґ, а єдночасно членка Націоналного совіту Русинів, Олена Папуґа. Участь брали і міністер освіты Бранко Ружіч, а шефка резорту людьскых і меншыновых прав Ґордана Чоміч.

Векшына пропозіцій народностных меншын ку даній темі освіты, котры были на стрічі передложены, буде подля аґентуры закомпонована до фіналной верзії Стратеґії розвитку освіты і навчаня у Републіці Сербія до 2030-го року.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА