Ведуча Руской Бурсы з нагородом бургомайстра Ґорлиц

Бургомайстер Ґорлиц з Новым Роком нагородил артистів, діячів культуры, творців, спортовців і підприємців, якы діют на обшыри міста. Офіцияльно переданя оцінінь одбыло ся 11. січня/януара 2022 р. вчас шторічной новорічной стрічы.

В тым році серед выріжненых осіб нашла ся ведуча Стоваришыня «Руска Бурса» в Ґорлицях і редакторка радия ЛЕМ.фм, Наталия Малецка-Новак. Ведуча лемківской орґанізациі з Ґорлиц оцініня отримала за осягніня в обшыри пошырюваня і плеканя нашой рідной культуры.

За культуру, освіту і радийо

Рафал Кукля передал нагороды в парох катеґориях. Были то оцініня в обшыри артистичной творчости, плеканя і охороны культуры та в обшыри спортовой діяльности. Як раз в тій першій ґрупі свою нагороду одобрала Наталия Малецка-Новак, доцінена за єй діяльніст в Стоваришыню Руска Бурса.

В лявдациі написано, што Наталия Малецка-Новак то ведуча лемківской орґанізациі. З нагоды ювілею 30-літя реактивациі Стоваришыня «Руска Бурса» в Ґорлицях, на ґорлицкым рынку одбыла ся выняткова подія – концерт під назвом «Памяти Нашых Бурсаків». Як раз то Малецка-Новак была том особом, яка як ведуча зорґанізувала упамятніня. Лавреатка была доцінена і за «заанґажуваня в будуваня меджекультурового діалоґу, пошырюваня лемківской традициі і культуры, розвиваня выдавничой, освітовой, науковой та інформацийно-популяризаторской діяльности, м.ін. через радийо Руской Бурсы ЛЕМ.фм».

Як підчеркує Наталия Малецка-Новак, признане оцініня належне є вшыткым ґорлицкым бурсакам. «Хоц нагорода признана іменно на мене, то абсолютні не трактую єй індивідуальні – є то нагорода для цілой Руской Бурсы за нашы спільны діяня, а особливо за річницьовый концерт, якій прошол 9. вересня/септембра 2021 р. на ґорлицкым рынку. Святкуваня бурсяной тридцеткы было великым успіхом. Імпрезу доцінили не лем власти, але вшыткы, котры гын были. Іщы долго доходили до нас теплы слова о подіі. Особливо дякую Олені Дуць і Павльови Малецкому за поміч при орґанізациі».

Окрем Наталиі Малецкой-Новак, нагороды бургомайстра в тій обшыри діяльности отримали і інчы особы, м.ін. театральный ансамбль ци Роман Дзюбина, ґорлицкій соспільный діяч лемківского походжымя, якій є презесом Стоваришыня і Ректором Університету Золотого Віку в Ґорлицях. Дзюбина є заанґажуваный в справу активізациі старшых осіб та активну участ в соспільным жытю Ґорличан.

Новорічні в новым місци

Стріча ґорлицкого бургомайстра з доціненыма ним особами в тым році одбыла ся в выремонтуваній по парох роках сали ґорлицкого Сокола. Была то нагода припомнути історию будинку і похвалити ся містецкыма властями змодернізуваным обєктом.

По ґали переданя выріжнінь і нагорід то як раз представникы спортовых товариств в Ґорлицях одобрали статуі символизуючы ключы до одремонтуваного обєкту, а вшыткы згромаджены черкнули ся при новорічным тоасті.

Головным артистичным пунктом проґраму был концерт Ґалицийского Квартету, котрый творят абсольвенткы Музичного Університету Фридерика Шопена в Білымстоку та Музичной Академіі в Кракові.