Вечер з лемківском культуром – реляция з Крениці, середа 21.00 год.

Тырват 19. едиция фольклорного фестівалю пн. Світ під Кычером, орґанізуваного ансамбльом Кычера з Ліґниці. Вчас фестівалю за справом Лемків презентувана єст культура ріжных народів з цілого світа, а і самы Лемкы вказуют свою культуру. Першы концерты і анимациі уж за нами, выступы проходили м.ін. в Свидници, Волові, Санкові, Крениці, Бортным і Ропици.

Вчера, то є в віторок 28. червця/юнія т.р., в рамках части фестівалю в Креници проходил Вечер з лемківском культуром, на якым почути мож было лемківскых і украіньскых артистів. Запрезентувал ся на ним Володислав Ґрабан, соспільний діяч, креницкій поета, зо свойом найновшом збірком поезиі пн. З землі до неба. Креницкій публиці вказала ся і лосяньска піснярка Юлия Дошна в дуеті з Антонийом Пільхом, якы выступили з піснями записаныма Оскаром Кольберґом, польскым етноґрафом. Вчера дует Дошна-Пільх дал ся почути головні в піснях з тому пн. Саноцкє-коросняньскє. По іх выступі бесідувал кєрівник Кычеры, Юрко Стариньскій, якій вказал част великой колекциі архівальных знимок, якы сут в посіданю Стоваришыня Ансамблю Пісні і Танця Кычера. Были то знимкы вказуючы головні прекрасне і богате лемківскє облечыня. Як повіл Ю. Стариньскій, до кінця т.р. плянуване єст печатаня Кычером обшырной моноґрафіі про лемківскє народне облечыня і альбому з архівальныма знимками з Лемковины. Стрічу закінчыл выступ співочо-інструментальной ґрупы Кычеры з лемківскыма співанками.

Зарпашаме до выслуханя реляциі з той стрічы.