Васильови Ябурови уділили Золоту медайлу ПУ

Як інформовав Інштітут русиньского языка і културы Пряшівской універзіты в Пряшові (ПУ), в понедільок 15-го апріля 2024-го року одбыло ся святочне засіданя Акдемічной громады ПУ.

В рамках нього удільовала ся і найвысша нагорода універзіты, котров є Золота медайла Пряшіской універзіты. Тоту нагороду ректор універзіты Петер Коня уділив Васильови Ябурови, єдному із двох головных кодіфікаторів русиньского языка на Словакії із 1995-го року.

Василь Ябур собі нагороду перевзяв за вызначну научно-педаґоґічну роботу і розвиток Інштітуту русиньского языка і културы і Пряшівской універзіты в Пряшові.

Василь Ябур

Доц. ПгДр. Василь Ябур, к. н. народив ся 28-го октобра 1936-го у Стащіні, втогды Чехословакія. І кедь быв за професійов русіста, а в тім фаху діяв як універзітный педаґоґ, од початку 1990-ых років зачав ся занимати кодіфікаціов русиньского літературного языка на Словакії.

У 1995-ім році, вєдно з доц. ПгДр. Юрійом Паньком, к. н., быв головным кодіфікатором русиньского языка на Словакії. Од року 1998 учів морфолоґію і сінтаксіс на сучаснім Інштітуті русиньского языка і културы Пряшівской універзіты в Пряшові, котрый перешов різныма назвами. Є автором або співавтором многых научных публікацій і учебників русиньского языка.

Нагороды Василя Ябура

Карпаторусиньскый научный центер в Споєных штатах Америкы уділив Васильови Ябурови у 2007-ім році Премію свв. Кіріла і Методія за розвиток русиньского языка.

У 2016-ім році му была передана Премія Александра Духновіча. Хоць Карпаторусиньскый научный центер в Споєных штатах Америкы уділює тоту премію за русиньску літературу, Ябурови была уділена за його великый вклад до кодіфікації русиньского языка, без котрой бы не было ани літературы.

Пряшівска універзіта в Пряшові уділила Васильови Ябурови Стріберну медайлу за ціложывотне діло і вызначный вклад до области наукы і освіты у 2019-ім році.

Округлый стіл Русинів Словакії в році 2020 запожычав Васильови Ябурови Орден Адолфа Добряньского IV. класы. Орден дістав за вызначный вклад до области розвитку русиньского языка.

27-го юна 2021-го року презідентка Словацькой републікы Зузана Чапутова уділила Васильови Ябурови Прибинів крест ІІІ. класы за вынятковы заслугы о розвиток Словацькой републікы і за заслугы при кодіфікації русиньского языка.

Фотоґрафії: Інштітут русиньского языка і културы ПУ