Варштаты з журналистикы

Стоваришыня «Руска Бурса» в Ґорлицях, Русиньскє культурно-освітнє общество А. Духновича в Пряшові та Вседержавний Русиньскій Самоуряд з Будапешту сердечні просят на дводньовы варштаты з журналистикы, котры пройдут 26.-27. серпня/авґуста 2017 р. в Бардийові.

Проґрам варштатів зосереджал буде ся на принципах варштату писаного слова в обшыри пресовой журналистикы та журналистикы он-ляйн. Преаналізуваны будут ріжниці медже інтернетовом, пресовом, радийовом та телевізийном журналистиком. В практиці буде мож дознати ся як редаґувати допис на сайт www, а як до нюслетера. Варштатовичы дознают ся про тото, як обслугувати соспільны медиі і якого рода зміст гын поміщати. Єдна з части варштатів посвячена буде редаґуваню допису про книжкы, з аналізом найчастійшых блудів, якы являют ся при інформуваню на тему книжок, а тіж тому, як робити інтервю з авторами.

На закінчыня варштатів, 27. серпня/авґуста заміряний єст концерт знаменитой артисткы, амбасадоркы пісен Петра Муранкы (прим. Посій же ся, посій, Шковраночок, Недоспівана пісня і інчы), Сусанны Ярой. Концерт буде проxодил на бардиівскым рынку.

Охочы взяти участ в безплатных варштатах прошены сут зголосити ся на адрес radio@lem.fm, найпізнійше до 23. серпня/авґуста (середа) 2017 р.

Варштатова стірча і концерт орґанізуваны сут в рамках проєкту Pro Rusyn Radio Programme, што реалізуваний єст вдяка фінансовій підпорі Медженародного Вышеградского Фонду.