Варштаты лемківского співу з Юлийом Дошном

Мазярска Загорода в Лоси, яка єст одділіньом Музею Дворы Карвациянів і Ґлядышів, в рамках проґраму пн. Мастер традициі орґанізує співочы варштаты. Мастером зголошено лемківску піснярку Юлию Дошну. Знана зо свого характеристичного співу і інтерпретациі народных лемківксых пісен, передваных з поколіня на поколіня, артистка буде вчыла ґрупу охочых варштатовичів ріжных народных співанок. Товаришыл буде ій акомпаніятор Антоний Пільх. Вшыткы особы, котры уж співают, а і тоты, што хотят зачати, можут ся зголостити.

Мастер традициі то проґрам реалізуваний Міністерством Культуры і Народовой Спадковины, жебы через безпосередню реляцию мастер-ученик передавати знаня, повязане з культуром нематерияльной дідовизны окрисленой соспільной ґрупы ци меншыны. Може то быти знаня співу, танця, граня на інструментах, знаня звыків і традиций, звязаных з обрядовістю, знаня традицийного ґаздівства ци артистичного ремесла і народной штукы. До проґраму можут зголошати ся інституциі культуры, соспільны орґанізациі і інчы. Влони Мазярска Загорода в Лоси орґанізувала цикль варштатів пн. Нове жытя дерева, вчас котрых народний артиста сницарского кумшту, Богдан Карел, переказувал знаня декоративной різбы в дереві участникам варштатів. Ефектом была выстава прац учеників. Більше про тоты варштаты і выставу можете почытати в єдным з архівальных дописів на портали.

Варштаты з Юлийом Дошном будут проходити 24. лютого/фебруара о 17.00 год. в Ґалериі Дворы Карвациянів в Ґорлицях. Сут безплатны, старчыт скорше ся зголосити, пишучы на адрес zagroda.maziarska@gmail.com, або задзвонити під номер: 18 353 43 63, 601 411 590.

Юлия Дошна на своім конті мат 10 платен. На музычній сцені присутна єст уж парудесят років. Через долгій час была солистком ансамблю Лемковина під кєрівництвом маестра Ярослава Трохановского. Спілпрацує з джазовыма, клясичныма музыками і інчыма артистами залюбленыма в лемківскым фольклорі. Актуальні концертує з Антонийом Пільхом з репертуаром, на якій складают ся пісні зо збірників опрацуваных через польского ентоґрафа Оскара Кольберґа.