Варголь і Новосільскій в Люблині

Пару днів тому была шыроко припоминана 30. річниця смерти короля поп-арту Енді Варголя (06.08.1928 – 22.02.1987). В звязку з тым, всякы музеі і інституциі на цілым світі рыхтуют выставы, на котрых сут вказуваны творы того выдатного артисты. Посліднім разом заявлали сме о двох подіях, якы прошли в Пьотркові Трибунальскым. Днес іфнормуєме о дальшій выставі, котра буде мала місце в Люблиньскым Музею.

Музей хоче в марцьовій выставі запрезентувати працы найвекшых артистів ХХ ст. Очывидно не бракне серед них Варгольовых творів, якы находят ся в приватній колекциі Тадеуша Мысловского. То знаний польскій ґрафік, маляр, різбяр та автор вельох інсталяций, котрий в 70. роках ХХ ст. еміґрувал до Ню Йорку. Гын, з відомых причын, зачал шырше інтересувати ся Енді Варгольом і його великом спадковином. Музей выстарал ся в колекцийонера о тото, жебы деякы з творів Варголя, якы находят ся в його руках, были выставлены неодогла на выставі.

На люблиньскій выставі запрезентуваных буде вшыткого близко 200 ґрафік з колекциі Тадеуша Мысловского і його жены. Окрем Варгольовых творів, вказаны будут творы такых артистів як Сальвадора Далі, Піета Мондряна ци Пабльо Пікасо. На выставі буде мож посмотріти і на творчіст Юрия Новосільского – єдного з найвызначнійшых лемківскых атристів-іконописців, філософів та теолоґів.

Одкрытя выставы – 17. марця 2017 р.