В Зомборі будуть приготовльовати і русиньскых педаґоґів

Як інформовала аґентура Рутенпрес, делеґація Націоналного совіту Русинів у Сербії навщівила Педаґоґічну факулту в Зомборі.

Причінов было обновліня приправы педаґоґів на навчаня в русиньскім языку. Русины у Сербії подля аґентуры будуть мати занедовго дефіціт абсолвентів спомянутой факулты, котры бы моли учіти і в русиньскых школах.

За Націоналный совіт Русинів были на стрічі з передставителями факулты участны Олена Папуґа, котра є предсидательков Секції про урядне хоснованя языка і писма, а єдночасно є у функції державного секретаря Міністерства про людьскы права, права меншын і соціалный діалоґ, далше секретарь Націоналного совіту Русинів Таня Арва Планчак, членка Секції про освіту при Націоналнім совіті Любиця Няради і докторанд історії Саша Сабадош.

Русиньску делеґацію за Педаґоґічну факулту в Зомборі прияв їй декан Саша Марковіч.

Русины на стрічі представили потребы свойой народностной меншыны в справі учітельскых кадрів. Обговорив ся і договор, же од октобра штирьоми теперішні русиньскы штуденты факулты будуть мати можливость абсолововати і дакілько курзів з методікы, русиньского языка і русиньской літературы.

При закінчіню штудій будуть їх діпломы богатшы о тоты абсолвованы предметы, на основі чого будуть кваліфікованы робити нелем в сербскых, але і в русиньскых школах і навчалных інштітуціях.

Тото саме, як пише Рутенпрес, буде односити ся і на новых штудентів. Факулта буде пропаґовати ся і на школах, де ся учать Русины, што може помочі факулті, котра має недостаток штудентів. Часть навчалного процесу по русиньскы бы на факулті в Зомборі мали учіти фаховці з Одділіня русиністікы Філозофічной факулты, котре діє на універзіті в Новім Саді.

Рутенпрес припоминать, же така практіка приправы новых русиньскых педаґоґів діяла до року 2006, і многы ґенерації мали довтогды можливость слухати лекції і на русиньскім языку.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА