В Вапенным будуют парк з амфітеатром

В курортным Вапенным додают атракций. На осін минулого рока отворили видокову вежу на убочах верха Фердель над Вапенным, тепер будуют парк з амфітеатром, водном каскадом, пляцами забав і спацеровыма стежками.

Курорт, подібні як і ґміна Санкова, в котрій ся находит, свою діяльніст в великій мірі операт на туристиці і промоциі реґіону. Не чудує, што в Вапенным фурт пошырюют інфраструктуру для туристів.

Інвестицию помістили в центрі села, напроти Здройового Дому. Вшыткы роботы мают скінчыти іщы в маю. Уж тепер видно, як тот простір буде заґаздуваный. Парк находит ся на горбку, його центром буде амфітеатр. «Буде то ідеальне місце, жебы орґанізувати не лем принагідны імпрезы, але тіж концерты» – бесідує Малґожата Малух, війт ґміны Санкова.

З афмітеатру видно не лем сцену і парк, але і панораму лемківскых гір. Вздолж сходів, при котрых замонтуют місця до сіджыня, зробили камінну каскаду. По одкрытю парку замінит ся в невеликій водопад, на кінци котрого буде невелика камінна фонтанна.

«Основом проєкту было, жебы не бетонувати того місця, зато лем паркінґовы місця выложено бруком. На стежкы до пішых прогульок высыпаны будут дрібны камінці» – додає М. Малух.

В парку буде іщы єдна атракция – загальнодоступна солянкова інгалятория. Дыханя повітрьом богатым в цінны мікроелементы (прим. йод, бром, калій, маґнез, желізо, содиюм) поправлят самопочутя, реляксує, додає енерґіі, очыщат дыхальны шлякы в тілі, зміцнят іммунітет.

Окрем выміненого, на трьох невеликых скверах зроблят пляцы забав для діти. Цілый проєкт дополняют пішо-роверовы стежкы. Вартіст інвестициі то близко 4 млн зл.