В Ужгороді припомянуть собі річніцю рукоположіня єпіскопа Йосифа Головача

В ужгородьскім Ґрекокатолицькім Хрестовоздвиженьскім катедралнім соборі припомянуть собі в четверь 16-го марца 2023-го року округлу 40-ту річніцю єпіскопского рукоположіня владыкы Йосифа Головача. З той нагоды буде в соборі одслужена архієрейска літурґія.

Владыка Йосиф Головач быв помічным єпіскопом Мукачовской ґрекокатолицькой єпархії і тітуларьным єпіскопом созопольскым в Хемінонто.

Преосвященый народив ся в Імстичові у втогдышній Чехословакії 11-го авґуста 1924-го року до родины священика Штефана Головача і Іріны Ляховіч. На священика быв рукоположеный блаженим єромучеником, мукачовскым єпіскопом Теодором Ромжом 14-го септембра 1947-го року. До року 1949 служыв священиком в селі Ярок. Пак пришла ліквідація Ґрекокатолицькой церькви з боку комуністічного режіму.

Од 1949-го до 1984-го року працовав у цівілній професії – в медициньскых установах на Підкарпатю. І попри тім далше служыв священиком в ілеґаліті.

15-го марца 1983-го року быв у Караґанді тайным мукачовскым єпіскопом Александром Хіром рукоположеный на помічного єпіскопа. Хіра там быв у выгнанстві. Рукоположіня владыкы Головача по обновліню Ґрекокатолицькой церькви і Мукачовской єпархії 16-го януара 1991-го року потвердив Святішый Престол і офіціално став помічным мукачовскым єпіскопом і тітуларьным єпіскопом созопольскым.

В тім часі быв за мукачовского єпарху потвердженый далшый тайно рукоположеный єпіскоп Іоан Семедій, як і другый помічный єпіскоп Іван Марґітич, котрый так само прияв єпіскопске рукоположіня тайно.

Владыка Йосиф Головач окрім того выконовав і функцію ректора Ужгородьской богословской семінарії.

Іщі в юні 1990-го року проходив в Римі Сінод єпіскопів Україньской ґрекокатолицькой церькви, на котрый пришов і владыка Іоанн Семедій вєдно з владыками Іваном Марґітичом і Йосифом Головачом, кедьже дістали запрошіня.

На сіноді быв владыка Семедій під тиском з боку україньскых єпіскопів, жебы його єпархія приєднала ся до складу україньской церькви. В тій думці мали україньскы єпсікопи союзника – Івана Марґітича, котрый быв проукраїньского напряму. Наопак, владыка Йосиф стояв вєдно з владыком Іоаном Семедійом на русиньскых позіціях і подарило ся їм утримати окремый статус русинськой Мукачовской єпархії.

Владыка Йосиф Головач вмер в Ужгороді 18-го юна 2000-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА