В суботу засідав Округлый стіл Русинів Словеньска. Тема єпіскопства ся пересунула

В суботу 27-го юна 2015 р. проходило в Пряшові вже 16-те засіданя Округлого стола Русинів Словеньска (ОСРС). Найголовншый пункт засіданя пересунув ся на далше засіданя, котре буде прохидити по літніх вакаціях.

Найважнішым пунктом суботнього засіданя русиньской платформы мало быти поданя інформації о можливости зряджіня русиньского єпіскопства з погляду выходного католицькго канонічного права. Інформацію мав подати священик Марош Прейса, котрый в ОСРС діє як представитель Ґрекокатолицького архієпіскопства в Пряшові. Кідьже ся про робочі обовязкы за свою неучасть допереду оправдав і свою неучасть на суботнім засіданю оголосив і ґрекокатолицькый свяченик Мілан Ясик із Общества св. Йоана Крестителя, котре найвеце довгды рокы підкреслює потребу душпастырьства заміряного на Русинів, членове ОСРС пересунули тот пункт проґраму на найблизше засіданя, котре буде проходити по літніх вакаціях.

Но Округлый стіл мав в проґрамі і далшы важны пункты. Членове ОСРС были інформованы о проходжіню 13-го Світового конґреса Русинів в Деві, котрый одбыв ся лем тыждень дозаду. Хоць ОСРС не є прямо членом конґресу, кідьже іде о одкрыту платформу, котра зъєдинує многы русиньскы обчаньскы здружіня, окремых незалежных актівістів і русиньскы професіоналны інштітуції, но його членове суть і членами конґреса. Конкретно є то Русиньска оброда на Словеньску і орґанізації, котры входять до Словеньской асоціації русиньскых орґанізацій. Такым способом ОСРС має контакт із міджінародным русиньскым рухом. Членове ОСРС перед проходжіньом конґресу обернули ся і на втогдышнього председу Світовой рады Русинів зо жадостьов, жебы почас конґресу была зачата діскузія о русиньскій сімболіці, чому як основа має служыти книжка Мілана Пилипа під назвов Русиньска народна сімболіка. Конґрес пропозіцію прияв і о проблематіці сімболікы бы ся мало в окремых членьскых державах бісідовати цілый рік, жебы до двох років, покля буде проходити далшый конґрес, міг быти вопрос сімболікы вырішаный і конґресом пропозіція прията.

Люба Кральова, котра є в ОСРС представительков за обчаньске здружіня Колысочка, інформовала участных о стрічі членів ОСРС з представителями Міністерства школства Словацькой републікы. Участны засіданя по інформації од Любы Кральовой згодли ся в тім, же про зліпшіня сітуації в русиньскім школстві буде потрібне тискати на зміну школьского закона, котрый бы може міг раховати із позітівнов діскрімінаційов про школы з навчалным языком або навчаньом языка народностных меншын. Днесь ся русиньске школьство мусить стрічати із такыма основныма проблемами, як є неохота з боку міністерства рішыти вопрос выдрукованя букварів, котры уж многы рокы не суть і так є огрожене тото найосновніше навчаня, з котрым ся в школі зачінать.

ОСРС зволив в доповнюючіх вольбах і нового члена презідії. Од суботы заступать індівідуалных членів в найвысшім орґані ОСРС Анна Кузмякова.

Петро Медвідь, пресовый говорця ОСРС

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА