В суботу має премєру філм о Русинови Михалови Стренкови

Єдна з найвекшых і найособнішых почливостей в історії марінякови сержантови Михалови Стренкови одбуде ся уж тоту суботу, пише портал tribdem.com.

Документарный філм під назвов „Our Flag Still Waves“ буде мати тоту суботу премєру почас припомінковой пєтной події в Споєных штатах Америкы в Джонставні. Тота премєра одбуде ся в рамках 70-го юбілею, котрым собі Споєны штаты Америкы припоминають подію, кідь 23-го фебруара 1945 р. Френклін Боро вєдно з далшыма пятьома вояками вытягли америцькый флаґ на японьскім острові Іво Джіма, на верьху званім Сурібачі. Тото фотоапаратом захопив фотоґраф Джов Розентал і є то єдна із найзнамішых фотоґрафій. На тій фотці є і Михал Стренк, америцькый вояк, котрый мав русиньске походжіня в Орябині, днешня Словакія.

Подля сервера tribdem.com філм ся не занимать лем тов історічнов дійов, але вказує і жывот Михала Стренка як дітины іміґрантів із Чехословакії. Стренк ся народив 10-го новембра 1919 р. в Орябині і кідь мав шість років з родічами одышов до Споєных штатів. Закінчів середню школу в Пенсілванії і в октобрі 1939 р. ся приголосив до наморной пехоты (маріняци). Умер 1-го марца 1945 р. Славным ся став як раз дякуючі фотоґрафії Розентала з вытягованьом флаґа, но цілкового покоріня острова, на котрім вытягнув флаґ, ся Стренк не дожыв.

Стренк быв нагородженый тыма америцькыма воєньскыма нагородами: Purple Heart, Presidential Unit Citation, America Defense Service Medal, American Area Campaign Medal, Asiatic-Pacific Area campaign with four stars, World War II. Victory Medal і далшыма. Похороненый є на Арлінґтоньскім цінтері, гроб ч. 7179, секція 12.

Аж у 2008 році америцькый вояк Мет Блейс, котрый быв приділеный ку беспечностній службі Америцькой амбасады на Словакії, дізнав ся, же Стренк не быв родженым Америчаном, але же гражданьство здобыв аж у 1935 році посередництвом натуралізації свого вітця, причім о тім ниґда не дістав жаден документ. Зато ся Блейс обернув на Іміґрачный і натуралізачный уряд зо жадостьов о выданя такых документів о гражданьстві Стренка. Тота жадость была выбавлена 29-го юла 2008 року. Документы перевзяла Стренкова наймолодша сестра Мері Перо в рамках церемонії Памятникам америцькой наморной пехоты в Арлінґтоні. Тым ся потвердило Стренкови його америцьке гражданьство.

Петро Медвідь

Фото: Ознамліня о смерти М. Стренка про його родину. Жрідло: tribdem.com

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА