В Старій Любовні бісідовали о народній співанці

Як інформовав Любовняньскый освітній центер, в суботу 12-го септембра 2020-го року в просторах Дому културы в Старій Любовні одбыв ся 17-ый річник Семінара о народній співанці під покровительством пріматора Старой Любовні Любоша Томка.

Головный орґанізатор – Общество музичного фолклору, тот семінар орґанізує шторік в іншім місті на Словакії. Довгодобов темов є досліджіня, документація і едіції народных співанок.

Любовняньскый освітній центер і місто Стара Любовня як співорґанізаторы запросили десять реферуючіх, котры ся занимали областьов словацько-польского приграніча на северовыході Словакії. Веце рефератів дотуляло ся якраз русиньского фолклору.

Першым реферуючім быв Мартін Караш, директор Любовняньского освітнього центру і председа Русиньской оброды, котрый мав реферат під назвов Народна співанка в народностно змішанім реґіоні Старой Любовні. О традічнім вецеголоснім співі в селі Шамброн бісідовав Мілан Щіґулиньскый, котрый є і ведучім Фолклорной ґрупы Шамбріньці. Ева Фаберова пресдставила Народну співанку в селі Якубяны – од колыскы по гроб.

Анна Деревяникова із Пряшівской універзіты в Пряшові бісідовала о шпеціфіках русиньскых народных співанок. Русиньскый етноґраф Іван Чіжмарь із Свідника презентовав тему під назвов Основы теренного досліджіня народных співанок.

Як освітній центер далше інформовав, єдным з выступів семінара, котрый люди могли смотрити і онлайн, буде і збірник рефератів, якый має быти выданый в найблизшых тыжднях.

Жрідло фотоґрафії: Ľubovnianske osvetové stredisko.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА