В словацько-польскім пригранічу ся з еврофондів підорить жывотне оточіня і обнова драг

Міністество інвестіцій, реґіоналного розвитку і інформатізації Словацькой републікы в тых днях выголосило першы вызвы з новых еврофондів.

З проґраму черезгранічной співпраці Interreg з Польщов были выписаны три вызвы на підпору жывота людей в пригранічу. Понад 41 міліонів евр піде лем на охрану жывотного оточіня і оправы драг в пригранічных реґіонах Словакії і Польщі.

Дестякы міліонів у трьох вызвах

Понад 41 міліонів евр піде в новім еврофондовім періоді на крокы проти дослідків клімматічной зміны, на охрану перед природныма катасрофами, охрану природы, але і на будованя драг, інформовала віцепремєрка і міністерка реґіоналного розвитку Вероніка Ремішова.

Перша вызва з нового проґраму Interreg Польща – Словакія є заміряна на превенцію різіка природных катастроф і адаптацію на зміну клімату. Аж 11 міліонів піде на такы проєкты як суть наприклад зелены стіны ці стріхы.

„З Польщов капчать нас сполочне природне богатство народных парків Высокы Татры, Пєнины і Полонины, а тым і одповідность за їх захованя про слідуючі ґенерації. Зато в тых областях підпоруєме охрану природы, але і турізм а роботу гірьской ратуючой службы,“ повіла віцепремєрка.

В рамках другой вызвы піде майже 4,9 міліона евр на охрану цінных природных теріторій. Підпору можуть здобыти проєкты заміряны наприклад на утримованя цілости еколоґічных корідорів, высаджіня стромів або охрану теріторій перед великым затяжіньом турістічным рухом.

З понад 25-міліонового паклика в третій вызві ся підпорять проєкты заміряны на перебудовы, реконштруцкії і модернізації драг. Планує ся управльовати шырка драгы, жебы легше ходило ся автобусам, будованя пішників і біціґльовых стежок, як і каналізація на воду з доджу.

Черьпати може і Пряшівскый край

Выголошены вызвы на словацькім боці граніці дотуляють ся Жіліньского і Пряшівского самосправного краю, а окресу Спішска Нова Вес в Кошыцькім самосправнім краю. В Польщі суть то области в Слезькім, Малопольскім і Підкарпатьскім воєводстві.

„Потенціал пригранічных реґіонів сьме дотеперь не доказали наповно схосновати. Нашым цільом є, жебы люди, котры жыють в пригранічу, мали европску якость жывота. Якраз проґрамы Interreg суть міцным і ефектівным інштрументом як условії про ліпшы черезгранічны капчаня творити. Вєдно з нашыма польскыма партнерами маєме намагу, жебы люди мали ку собі ближе,“ додала Ремішова.

Співпраца з Польщов меджі найуспішнішыма

Як інформовало міністерство, в проґрамовім періоді, котрый кінчіть, належав проґрам Interreg Польща  – Словакія ку найуспішнішым еврофондовым проґрамам.

Подарило ся вдяка ньому наприклад выбудовати і означіти 2700 черезгранічных рекреачных пішників – научных пішників, турістічных трас і біціґльовых стежок, змодернізовати 160 км драг і обновити 400 обєктів културной і природной дідовизны.

На новый проґрамовый період є окрім проґраму Interreg Польща – Словакія в сумі 162 міліонів евр схваленый і програм з Чеськов републіков, на котрый є сума 107 міліонів, з Мадярьском в сумі 161 міліонів і Австрійов, де є алокованых 69 міліонів евр.

Проґрам Interreg NEXT, до котрого залучена є і Україна, має выділеных 73 міліонів евр.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА