В селі Уліч протестовали. Держава не закликала властників фундушів на їднаня

Приблизно 50 представителів властників лісів в Народнім парку Полонины і їх сімпатізантів стрітило ся в середу 22-го новембра 2017-го року в русиньскім селі Уліч, в окресі Снина, жебы протестовати проти практікам Державной охороны природы Словацькой републікы (Štátna ochrana prírody SR), котра в селі мала робочу стрічу ку зонації теріторії Карпатьскых буковых пралісів, якы суть хоронены через UNESCO.

Протестуючім не любило ся, же пріватных маїтелів фундушів на їднаня не запросили, хоць ся того домагали. Інформовала о тім словацька державна пресова аґентура TASR. Неспокійны маїтелі декларовали, же суть проти будьякой зонації, покля не будуть ясны змлувны осдносины, россяг обмеджінь в лісах, а і выкрытя фінанчной компензації із державного бюджету.

Подля Мілана Овсеніка, председы Унії реґіоналных здружінь властників недержавных лісів Словакії (Únia regionálnych združení vlastníkov neštátnych lesov Slovenska), Міністерство жывотного оточіня Словацькой републікы і Державна охорона природы зробили хыбу в комунікації із пріватныма маїтелями і стратили їх довіру. Із той причіны урбарi в Полонинах не суть согласны, жебы їх теріторії были выголошены за цінны і хоронены через UNESCO, покля не мають ясно доїднаны правила о фінанчных компензаціях, котры людям в тій области уможнять пережыти, кідьже ґазовати в хороненых лісах, котрых суть маїтелями, не будуть годны. Овсенік інформовав, же на їднаню в середу ся нич не доїднало, ани не підписало.

Міністерство жывотного оточіня приобіцяло лем тілько, же в штонайскорішім часі скличе далше їднаня і зажене тым субєктам, котрых ся проблем дотулять, пропозіцію „змлувы о будучій змлуві“. Подля Овсеніка ся охорона Карпатьскых буковых пралісів прямо дотулять 10-ох аж 12-ох урбарьскых обществ, котры здружують веце як 4000 людей обгосподарюючіх коло 10 тісяч гектарів лісів.

Проблемом мають быти граніці, котры Словакія в році 2007 презентовала перед UNESCO як цінны пралісы із алокаційов майже 5700 гектарів, причім їх подля протестуючіх реално є ледво 3000. Овсенік твердить, же теперь іде робоча ґрупа натігати тоты граніці пралісів і там, де ани їх ніт, без того, жебы взяли до увагы, ці з тым маїтель є або не є согласный.

„Сьме цалком на кінцю Словакії, два кілометры од выходной граніці із Українов. Хочеме вказати, же уж того было доста, што робить Державна охорона природы. Нашым геслом є, же уж не хочеме, жебы о нас рішыли без нас і же мы сьме ліс. Вже было доста демаґоґії, котра ся веде в тзв. кругах охранарів і покля собі не докажеме сісти за єден їначій стіл, та будуть ся вытваряти лем далшы конфлікты міджі людми,“ повів про аґентуру TASR Овсенік. Протест пришли підтримати і властници лісів з іншых областей Словакії, котры мають подобны проблемы.

Говорця Міністерства жывотного оточіня Словацькой републікы Томаш Ференчак повів, же іде о цінну локаліту, котру треба всокотити про далшы ґенерації, што значка UNESCO лем підкреслює. Ґарантовати 5700 гектарів в Полонинах подля його слов выходить із міджінародного проєкту 12-ох держав, котрый зачав перед 10-ма роками.

Жрідло фотоґрафії: www.sopsr.sk.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА