В русиньскім реґіоні бы мали выникнути три хоронены ареалы

На Словакії бы мали выникнути далшы три хоронены ареалы. Іде о теріторії в русиньскім реґіоні, конкретно Вышній ток Хотчанкы, Вышній ток Выравы і Лаборець.

Як інформовала аґентура TASR, выходить то з матеріалів, котре Міністерство жывотного оточіня Словацькой републікы передложыло до меджірезортного припомінкового процесу.

Вышній ток Хотчанкы бы ся мав находити в окресі Стропків, в катасралній теріторії села Дрічна. Цілкова теріторія хороненого ареалу бы мала быти 2,55 гектара. Платити бы там мав другый ступень охороны. Хоронити бы ся мали гірьскы водны токы і їх деревинова веґетація з Мірікарійов німецьков (Myricaria germanica) і Міногов потисков (мадярьсков, Eudontomyzon danford).

В окресі Меджілабірці в катастралній теріторії села Вырава має быти выголошеный хороненый ареал Вышній ток Выравы на 19,47 гектарах. Платити бы ту мав другый ступень охороны. Находять ся там ясеньово-вільховы підгірьскы заплавны лісы і звірята як Выдра річна (Lutra lutra), Кунька жовтобріха (Bombina variegata) і далшы.

Хороненый ареал Лаборець бы мав быти в окресі Меджілабрці в катастралній теріторії сел Чертіжне, Габура і Борів. Про ареал бы мав платити третій ступень охороны і мав бы мати 24,96 гектарів. На тій теріторії так само суть ясеньово-вільховы підгірьскы заплавны лісы і далшы цінны рослины, але найдеме там такы жывы творы як ящуры і бобры, з котрых там жыють аж по три різны сорты.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА