В Румунії стрітили ся католицькы єпіскопи восточного обряду

Од 16-го до 19-го септембра 2024-го року проходить в румуньскім місті Орадеа XXV. стріча восточных католицькых єпіскопів Европы. На стрічі тот рік занимають ся темов плеканя братства меджі єпіскопом і священиками.

„Односины меджі єпіскопом і священиком – братство і людьскость. Сінод о сінодалности“, то офіціална назва темы, котру тот рік рішають восточны католицькы єпіскопи в рамках свойой стрічі, котра має шторічну традіцію. Стрічу орґанізіє Рада єпіскопскых конференцій Европы, і тот рік єй гостить Орадейска єпархія Румуньской ґрекокатолицькой церькви.

Участный і префект Дікастерії про восточны церькви

Як на своїм порталі інформовала україньска редакція Radio Vaticana, проґрам почав ся в понедільок стрічов єпіскопів з представителями містных властей, і обсягує лекції на дану тему, взаємне общаня і сполочну молитву.

Євхарістічны богослужіня в містнім катедралнім соборі і далшых двох храмах міста Орадеа мають поступно одслужыти владыка Віржіл Бечеа – орадейскый єпарха, Блаженійшый Святослав Шевчук – верьховный архієпіскоп києво-галичскый, і Высокопреосвященый Філіп Кочіш – гадудороґскый архієпіскоп і митрополіта.

Почас пленарных засідань выступити мають кардінал Клавдіо Ґуджеротті – префект Дікастерії про восточны церькви, філаделфскый митрополіта Україньской ґрекокатолицькой церькви владыка Борис Ґудзяк, ці владыка Мануіл Нін – єкзарха Апостосльского екзархату Ґреції.

Окрім Высокопреосвященого Філіпа Кочіша, котрый вже быв спомянутый, на стрічі суть і далшы єпіскопи, котры репрезентують наслідників русиньской традіції – Ужгородьской унії. Присутным є мукачовскый помічный єпіскоп Ніл Лущак, ніредьгазькый єпарха Авел Сочка, єпарха Єпархії Святого Николая в Руськім Керестурі Ґеорґій Джужар, архієпіскоп Кіріл Василь – кошыцькый єпарха ці владыка Мілан Лах – помічный братіславскый єпіскоп.

Новы єпіскопи на стрічі в Римі

На шторічній стрічі восточных єпіскопів Европы не беруть участь Высокопреосвященый Йона Максим, пряшівскый архієпіскоп і митрополіта, і владыка Теодор Мацапула, мукачовскый єпарха.

Тоты дві новы головы містных церьквей, котры были рукоположены на єпіскопів лем в тім році, ішли на тыждньову стрічу новых єпіскопів Католицькой церькви, яка проходить од 15-го септембра в Римі. Така стріча орґанізує ся так само каждый рік, і орґанізує єй Дікастерія про єпіскопів.

На кінцю тыждньового проґраму вшыткых новых єпіскопів прийме на авдієнції Вселеньскый Архієрей – Папа римскый Франціск.