В рамках тыждня бібліотек презентація Валерія Падяка

Од понеділька 4-го марца 2024-го року проходить цілословацька подія Тыждень словацькых бібліотек. То вже 25-ый річник той події, котра тот рік має мотто Бібліотекы про вшыткых.

В рамках тыждня бібліотек приготовила Державна наукова бібліотека в Пряшові подію під назвов Стара русиньска література – по новому. Іде о лекцію высокошкольского педаґоґа Доц. Мґр. Валерія Падяка, к. н., котра буде скапчана з бісідов і презентаційов книг із авторьской і выдавательской діятельности Падяка.

Подію орґанізує Одділіня історічных фондів Державной науковой бібліотекы в Пряшові, і є повязана з презентаційов проблематікы баданя славістікы, історічных русинік, выдаваня оріґіналной творчости особностей в новім выготовліню Валерія Падяка.

Презентація одбуде ся в середу 6-го марца 2024-го року о 16.00 год. в просторах бібліотекы в Пряшові.

Валерій Падяк (1959 р., Ужгород) здобыв освіту на Ужгородьскій державній універзіті в шпеціалізації на російскый язык і літературу. Кандідата філолоґічных наук оборонив на Інштітуті літературы Т. Г. Шевченка Академії наук Україньской совітьской соціалістічной републікы в Києві, а доцентуру на Універзіті Коменьского в Братіславі.

Од 2010-го року робить як высокошкольскый педаґоґ на Інштітуті русиньского языка і културы Пряшівской універзіты, котрый днесь належыть під Центер языків і култур народностных меншын ПУ.

Падяк сістематічно занимать ся проблематіков старшой і сучасной русиньской літературы і културы, русиньсков драматурґійов і професіоналным театром. В Ужгороді має властне выдавательство.