В пятніцю зачінать театралный фестівал в Руськім Керестурі

В Руськім Керестурі в Сербії в пятніцю 17-го апріля зачінать вже 47-мый річник театралного фестівалу під назвов Драматічный меморіал Петра Різнича Дяді. Фестівал є як все орґанізованый керестурскым Домом културы і його завершіня буде в суботу 25-го апріля.

Фестівал понукать богатый розмаїтый репертоар і публіка буде годна видіти 14 театралных пєс, з котрых вісем буде про дорослу публіку і шість про діти. На меморіалі будуть брати участь Руськый народный театер „Петро Різнич Дядя“, Дрматічне штудіо „АРТ“ керестурского Дому културы, але і далшы ансамблі з Кулы, Петровець в Хорватії, Нового Саду, Дюрдьова і далшых місц у Войводині.

Завершіньом фестівалу буде выступліня єдиного на світі русиньского професіоналного театру – Театру Александра Духновіча з Пряшова. Театер там выступить 25-го апріля наперед о 13.00 год. пополідне з новов приповідков, котра мала премєру лем минулый місяць і має назву Кідь бы пришов… Остатнім представліньом фестівалу, котре так само принесе Театер Александра Духновіча, буде пєся, котра є драматізаційов прозаїчной предлогы вызначной словацькой писателькы з епохы крітічного реалізму Божены Сланчіковой – Тімравы з назвов Тяпаковці.

Почас фестівалу буде проходити у віторок 21-го апріля і Округылй стіл на тему „Сучасный став театралной діяльности Русинів“.

Петро Різнич Дядя, котрому є меморіал присвяченый быв актором, режісером, педаґоґом і културно-освітнім діятельом серед Русинів у Войводині. О театер зачав інтересовати ся іщі на ґімназії, котру абсолвовав на Україні, в части, котра належала Російскій імперії, де ся народив. В 1919 році переселив ся до міста Старый Вербас і зачав орґанізовати драматічны кружкы серед войводиньскых Русинів. Театралны пєсы зачав робити в Рускім Керестурі, Коцурі, но і в іншых центрах русиньского неселіня. У 1933 році засновав у Вербасі театер „Руска драма“. По Другій світовій войні ся переселив до Руського Керестура, де передавав лекції російского языка, но засновав там і драматічный і фолклорный ансамблі. У 1948 році засновав першый русиньскый аматерьскый театер і о два рокы пізніше і ляльковый театер. Його мену суть присвячены як споминаный меморіал, так і Руськый народный театер „Дядя“.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА