В Пряшові заспівать Сервіцька, в Кошыцях сестры Угларовы

8-го октобра 2017-го рока Пряшів і Кошыці будуть гостити русиньскы концерты. В Пряшові ся представить Анна Сервіцька із своїма гостями, в Кошыцях выступлять сестры Угларовы і Фолкорны колектівы Удолчанка і Поляна.

Кед собі зашпівам

Концерт Анны Сервіцькой під назвов Кед собі зашпівам, котрый орґанізує обчаньске здружіня Колысочка, і якый під покровительство взяла пріматорка міста Пряшів Андреа Турчанова в рамках 770-ой річніці од першого писамного документу о місті, одбуде ся в Парку културы і оддыху і зачінать о 17.00 год. Окрім знамой солісткы русиньской народной співанкы ся на концерті представлять і їй гості – Музика Мілана Рендоша, Співацька ґрупа Бурсінкы, Дітячій фолклорный колектів Шафола, Народна музика Дрібна і далшы выступаючі. Проґрамом буде проводити Ярослава Сисакова, акторка Театру Александра Духновіча в Пряшові.

Заспівайме собі

Кошыцькый концерт є орґанізованый Містнов орґанізаційов Русиньской оброды на Словеньску і має назву Заспівайме собі. Концерт, в рамках котрого ся представлять Удолчанка із Удола, Поляна із Орябины і сестры Угларовы із Блажова, одбуде ся в Културнім центрі Южан в Кошыцях зо зачатком о 15.30 год. і вступ є бесплатный.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА