В Пряшові быв інтронізованый новый апостольскый адміністратор

В неділю 8-го мая быв у Катедралнім соборі святого Йоана Крестителя в Пряшові інтронізованый до уряду апостольского адміністратора sede vacante Пряшівской архієпархії владыка Петро Руснак, братіславскый єпарха.

Як інформовав говорця Пряшівской ґрекокатолицькой архієпархії Михал Павлишіновіч, на початку торжественной події Монс. Андрій Євчук, шарже д-аффер (chargé d’affaires) Апостольской нунціатуры на Словакії прочітав декрет Конґреґації про восточны церькви в Римі.

В нім ся пише: „Кедьже про канонічне зречіня ся єпіскопскых обовязків Його Ексцеленції Йоана Бабяка, подля припису канона 210 Кодексу канонів восточных церьквей Пряшівска метрополітна архієпархія стала вакантнов, Його Святішість Папа Франціск 25-го дня місяця марец 2022-го року до спомянутой архієпархії ласкаво послав і рачів выменовати їй апостольскым адміністратором sede vacante Його Ексцеленцію Петра Руснака, єпіскопа Братіславской єпархії візантійского обряду, вєдно із вшыткыма правами і обовязками, котры повязаны з тым урядом.“

Зречіня ся уряду пряшівского архієпіскопа і метрополіты Йоана Бабяка Папа римскый Франціск прияв 25-го апріля 2022-го року. Владыка Петро Руснак зіставать єпархіалным єпіскопом Братіславской єпархії, і вєдно з тым буде рядити Пряшівску архієпархію як апостольскый адміністратор.

Головным служытельом торжественной літурґії быв новый апостольскый адміністратор, котрый і проповідав. Вєдно з ним служыли владыка Йоан Бабяк, владыка Маріян Андрій Пацак, Монс. Андрій Євчук, за Кошыцьку єпархію быв участный архімандріта Ярослав Лайчіак і приблизно тридцять священиків Пряшівской архієпархії.

На кінцю літурґії подяковав владыкови Йоанови Бабякови за 19 років єпіскопской службы отець Любомір Петрик, делеґат ad omnia Пряшівской архієпархії. Делеґат ad omnia подля церьковного права є выменованый апостольскым адміністратором,  і є другым штатутарьом єпархії. Має выконны власти.

Усвоїм дяковнім приговорі підкреслив безпрестайну службу владыкы Бабяка, через котру „Бог підняв Ґрекокатолицьку церьков, што было уміцнене і минулорічнов Святов літурґійов, котру служыв у Пряшові Папа римскый Франціск почас свойой апостольской навщівы на Словакії.“

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА