В Празі одбуде ся 20-та стріча народностных меншын. Буде конференція і културный ґалавечур

4-го новембра 2021-го року одбуде ся в Празі вже 20-та стріча народностных меншын вєдно із конференційов під назвов Рефлексії і перспектівы народностных меншын.

Акція, котра буде проходити в Новій будові Народного музея, одбуде ся під покровительством Ганы Тжештіковой, радной Головного міста Прагы про область културы, выставництва і турістічного руху. Стріча і конференція є орґанізована Головным містом Прага вєдно з Домом народностных меншын в Празі і Народным музейом.

На конференції і рефераты о Русинах

Конференція буде мати два блокы: Людьскы права в контекстах і Блок Академії народностных меншын: візії і рефлексії.

В в рамках народностного блоку будуть мати Русины аж двох представителів. Аґата Пілатова, родачка з Ужгорода, котра є довгорічнов новинарьков і публіцістков, русиньсков актівістков і бывшов предсидательков Общества приятелів Підкарпатьской Руси, буде мати реферат на тему Підкарпатьска Русь і Русины як жыва тема. Історія і сучасность. Науковці, публіцісты, штуденты, верейность.

Другов выступаючов із рефератом буде директорка Словацького народного музея – Музея русиньской културы в Пряшові Люба Кральова. Тота одпрезентує тему Русины на Словакії в трансформачных процесах по 1989-ім році (шпеціфічны проблемы языковой і народной себерефлексії).

Почас конференції одбуде ся і святочне вручаня Оцініня председы Комітету про народностны меншыны Заступительства Головного міста Прагы за вынятковый вклад в области жывота народностных меншын в Празі.

Културный ґалавечур

По науковій части буде проґрам продовжовати вечерным културным проґрамом під назвов Laskavost – medzi lidmi most (Ласкавость – меджі людми міст).  Ґалавечур буде цілый присвяченый културі і уменю, а буде цілый в режії представителів народностных меншын.

Представлять ся музичны і танечны ансамблі, як і далшы умелці, котры одпрезентують уменя, яке выходить з богатых културных традіцій того котрого народа.

Ґалавечур є завершіньом довгодобого проєкту з єднаков назвов, котрый приносив до матерьскых школ, школ, домів про сеніорів інформації о народностных меншынах, котры жыють в Чеській републіці.

Як пишуть орґанізаторы, од януара до фебруара 2021-го року ся орґанізовали розлічны бісіды, освітні проґрамы, компонованы театралны проґрамы, котрых цільом было творити мосты меджі народами і ґенераціями, і то посередництвом взаємной ласкавости, котра є і моттом цілого проєкту.

І в рамках того проґраму одпрезентують ся Русины. Цілый проґрам конференції і културного ґалавечора собі можете посмотрити ту.

Дубайовы в Празі

Присутность директоркы русиньского музея на конференції схоснує і Словацькый дім в Празі. Вєдно із Карпаторусиньскым краяньскым центром, Общінов Словаків у Чеській републіці і Урядом про Словаків жыючіх в загранічу о день пізніше, 5-го новембра, орґанізує бісіду з Любов Кральовов о выставці Дубайовы – Анна і їй діти, котра в місяцях юн аж октобер была наіншталована в СНМ – Музею русиньской културы в Пряшові.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА