В Осаднім посвятили церьков по реконштрукції інтерьєру

Як інформовав Петро Сорока, православный священик із Осадного, Сниньского окресу, в суботу 10-го септембра 2022-го року одбыло ся посвячіня Церькви Вознесенія Господня, котра перешла великов реконштрукційов інтерьєру.

В Осаднім остатній раз служыли ся боголсужіня 5-го юна того року на храмовый праздник – одпуст. Церьков у Осаднім є народнов културнов памятков і реконштруцкія, котра проходила три місяці, была реалізована із згодов а допереду становленым поступом робот з боку Памяткового уряду в Пряшові.

Окрім інтерьєровых стін храму была зроблена і нова електрифікація, централне грітя, репасованый быв історічный лустер, купив ся новый лустер до олтарьной части, як і новы лампы на стіну. Обновило ся і озвучіня церькви.

„Оправу інтерьєру підпорили сумов 23 800 евр посланці Пряшівского самосправного краю в рамках проєкту Реновація інтерьєровых стін православного храму в Осаднім,“ інформовав Сорока з тым, же на реконштрукцію пожертвовали і многы далшы дарцьове.

Церьков по реконштруцкії посвятив архідекан про окресы Снина і Гуменне прот. Іґор Кереканіч, головным служытельом літурґії, котра пак слідовала, быв містный декан прот. Борис Грустіч, з котрым окрім спомянутого декана Кереканіча служыли прот. Петро Сорока і прот. Маріян Коваль.

По святій літурґії отець Сорока подяковав присутным духовным і віруючім за участь на тій торжественній події, познакомив їх з роботами і прочітав довгый список донорів, котры пожертвовали на реконштрукцію. Так само высловив пересвідчіня, же в близкій будучности подарить ся оправити і екстерьєр церькви а окрасити єй новым розписом на стінах.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА