В Новім Саді одбыв ся фестівал новой співанкы Ружова заградка

34-ый рiчник Фестівалу новой русиньской співанкы Ружова заградка одбыв ся в неділю 17-го марца 2024-го року на Великій сцені Йован Дьордєвіч Сербского народного театру в Новім Саді. Інформовала о тім аґентура Рутенпрес.

Фестівал быв орґанізованый Радіом і телевізійов Войводины (РТВ), з окремым анґажованьом русиньскых редакцій у радію і телевізії а Музичной редакції РТВ. Войводиньске радіо і телевізія з події робили і прямый ефір.

Кедьже іде о конкурзный фестівал авторьской співанкы, найліпшы композіції выберала собі публіка, як і пятьчленна фахова журі.

На тогорічнім фестівалі Ружова заградка было одпрезентованых 15 новых русиньскых композіцій. Публіка за найліпшу співанку выбрала Мир там це чека, котрой текст написала Ася Папуґа і музику скомнпоновав Александар Човс. Інтерпретовала єй на фестівалі Таніта Ходак Планчак.

Журі выбрала за найліпшу композіцію співанку Пяти бок швета, котрой музику скомпоновала Татяня Колєсар Ґвоіч на текст Мірославы Даждіу, і інтерпретовала єй Мірела Тімко. На другім місці скінчіла вже споминана співанка Мир там це чека, а третє місце припало композіції з назвов Гвиздочка.

Співанка Пяти бок швета здобыла од журі і нагороду за найліпшый текст, нагороду за найліпшый аранжман здобыв Ервін Малина за тоту саму співанку. Нагорода за найліпшу інтерпретацію дістала Татяна Яшко, котра співала співанку Гвиздочка.

В рамках тогорічного фестівалу Ружова заградка публіка мала так само нагоду припомянути собі дакотры із найкрасшых співанок, котры про фестівал свого часу написали вже покійны Владислав Надьмитро і Михал Лікар, авторы, котрых творчость овпливнила многы із попередніх річників фестівалу.

Фото: Рутенпрес.